CSIF apela a la unidá sindical énte la fuelga indefinida del profesoráu y pide al Gobiernu una mesa de negociación

   UVIÉU, 28 May. (EUROPA PRESS) -

   El sindicatu CSIF reclamó esti miércoles la unión sindical de cara a la fuelga indefinida del profesoráu y encamentó al Gobiernu del Principáu a abrir una mesa de negociación pa encetar "los problemes reales" del sistema educativu. Asina lo manifestó'l presidente del sector d'educación de CSIF Asturies, Jorge Caro, na concentración celebrada frente a la Conseyería d'Educación n'Uviéu, la segunda consecutiva esta selmana.

   "Dende CSIF vamos facelo too por tener la unión sindical y por poder ufiertar a los docentes lo que nos piden", señaló Caro, quien confirmó qu'unviaron un manifiestu a les organizaciones convocantes de la protesta del martes -UXT, CCOO y Suatea- pa que se sumen a la fuelga indefinida empecipiada pol so sindicatu. "Ufiertámos-yos directamente puestos na mesa de negociación de fuelga", añedió.

   La protesta, qu'axuntó a centenares de docentes na Plaza d'España d'Uviéu pa pidir la dimisión de la conseyera d'Educación, Lydia Espina, celebróse momentos dempués de que'l presidente del Principáu, Adrián Barbón, anunciara que'l Gobiernu rexonal ataya la suspensión del amenorgamientu de xornada nos centros educativos.

   Trátase d'una midida que xenerara refugu nel profesoráu y que, según CSIF, nun resuelve los problemes de fondu del sistema educativu. Pa Caro, esta decisión "nun significa nada" si nun va acompañada de midíes estructurales. "Ye una reconocencia implícita de que per última vegada volvieron meter la pata y volver a metela gravemente", señaló".

   Ente les principales reivindicaciones, CSIF mentó la falta de personal, la situación nos centros d'educación especial, na Formación Profesional, n'infantil y en primaria, así como los retayos salariales por baxes médiques en secundaria. "Non podemos ponenos enfermos porque nos descuentan hasta 500 euros al mes", denunció.

   En relación cola xornada de protesta, Caro afirmó que la participación volvió ser alzada. "Ayeri pela mañana hubo equí 4.000 compañeros, agora mesmu nun sé cuántos hai, pero atrevome a apostar qu'hai más de 2.000 o 3.000", declaró.

   El sindicatu, que caltien la so convocatoria de fuelga indefinida, repitió que respuende a una demanda del colectivu docente. "Convoquemos una fuelga indefinida porque nos lo piden los compañeros que tenemos detrás", apuntó, refiriéndose a lod profesores que taben na concentración. "Queremos negociar, queremos arrleglalo, pero agora la pelota ta nel teyáu del señor Barbón. Tien que movese", concluyó.