CSIF critica la dexadez del Principáu énte la situación del colectivu d'Axentes del Mediu Natural

   UVIÉU, 6 Mar. (EUROPA PRESS) -

   El sindicatu CSIF criticó esti vienres la dexadez y falta de previsión del Gobiernu del Principáu d'Asturies énte la situación na que ta'l colectivu d'Axentes del Mediu Natural.

   Al traviés d'una nota de prensa, esplicaron que la llei básica d'axentes forestales y medioambientales establecez el derechu a la xubilación antemanada de los Axentes, asina como la imposición d'una serie d'obligaciones a les Comunidaes Autónomes.

   Añeden que n'Asturies, con un colectivu de 260 persones, y onde l'actual plantiya yá tien un porcentaxe d'interinidá que ronda'l 40%. Vamos camín del colapsu cola llegada de les primeres xubilaciones, que van superar les 60 a lo llargo d'anguaño, na mayoría de los casos, de puestos de mandu, alvirtieron.

   Énte esa situación, que yá yera previsible, consideren que l'Alministración del Principáu debería d'adoptar les midíes necesaries p'apangar les sos consecuencies, sobremanera teniendo en cuenta que tán pendientes de convocar les oposiciones pa cubrir 76 places.

   Con esta situación, na que los Axentes del Mediu Natural van llegar a una interinidá que va superar el 60%, CSIF alerta de que la vixilancia ambiental n'Asturies va vese seriamente comprometida.

   Argumenten que se trata d'un cuerpu cola condición d'axentes de l'autoridá, policía alministrativa especial y policía xudicial, onde la interinidá tendría de ser residual.

   "Dende la Conseyería de Movilidá inda nun realizaron les acciones necesaries p'adaptase a la llei básica d'Axentes Forestales. En concreto, sigue ensin establecese una formación inicial a les persones de nuevu ingresu, formación enfocada sobremanera a cuestiones de seguridá. Nesti mesmu ámbitu, tampoco regularon la utilización de los medios de protección y defensa de los axentes, comprometiendo la so seguridá nes actuaciones que desenvuelvan", esplicaron.

   Dende'l sindicatu critiquen tamién l'actual organización interna, con una distribución na que'l colectivu sigue estremáu en dos bloques, una parte dedicada al ámbitu forestal y otra a la vixilancia de caza, pesca o parques naturales.

   CSIF diz que yá unviaron distintes comunicaciones tanto a la Dirección Xeneral como al Conseyeru de Movilidá ensin qu'hasta la fecha tuvieren contestación. Encamienten a l'Alministración a que busque una solución inmediata a toos estos problemes. Porque la seguridá de los Axentes del Mediu Natural y la protección del nuestru mediu ambiente ta en riesgu, aportunen.