Cultura prepara una guía pa impulsar les llingües propies nel ámbitu municipal y suma l'eonaviegu al Eslema

   UVIÉU, 28 Abr. (EUROPA PRESS) -

   La conseyera de Cultura, Política Llingüística y Deporte, Vanessa Gutiérrez, anunció mientres la xunta de la Rede de Normalización Llingüística qu'el so departamentu prepara una guía pa impulsar nel ámbitu municipal la normalización de les llingües propies d'Asturies y pa garantizar los derechos llingüísticos de les sos falantes.

   Esti documentu, que va poner a disposición de los entes locales y de los sos servicios de normalización, va cuntar con información y documentación actualizaes y propón acciones de promoción del asturianu y el eonaviegu n'ámbitos como l'actividá municipal, el comerciu, la dinamización cultural o l'ociu.

   Nel alcuentru, celebráu en Llaboral Ciudá de la Cultura, Vanessa Gutiérrez fizo balance del llabor desenvueltu polos servicios de Normalización Llingüística nos últimos años, nos que destaca l'apueste de la conseyería por estes entidaes, con un aumentu presupuestariu del 66% dende 2019.

   P'anguaño, Cultura destina 415.320 euros a financiar estos organismos, qu'ufierten sofitu en 36 conceyos que tomen al 60% de la población. Amás, la Rede, de la que formen parte alredor de 40 conceyos y otres entidaes, cuenta per primer vegada con un presupuestu propiu de 50.000 euros pal desenvolvimientu d'actividaes complementaries que contribuyan a normalizar les llingües propies de la comunidá: l'asturianu y el eonaviego.

ESLEMA, EL TRADUCTOR AL SERVICIU DE LA CIUDADANÍA

   Tamién se presentaron meyores en recursos clave, como l'actualización del Eslema, la versión ameyorada del traductor al asturianu, que la próxima selmana, coincidendo cola celebración de la Selmana de Les Lletres Asturianes, va incorporar tamién el eonaviegu. Asina, Cultura amplía les capacidaes tecnolóxiques disponibles pa dambes llingües.

   A esti meyora súmase la publicación na web institucional de Política Llingüística de los modelos de formularios alministrativos descargables n'asturianu, pa facilitar el so usu nes xestiones locales. Los documentos puen descargase en: https://politicallinguistica.asturias.es/

   La conseyera presentó a los representantes municipales la Estratexa de Normalización del Asturianu y del Eonaviegu 2026-2030, ellaborada pol so departamentu. Esti documentu ta concebíu como una ferramienta tresversal con 245 acciones concretes p'avanzar na normalización social.

   Nesti sentíu, nel marcu de la xunta repasáronse dalgunos de los principales finxos de la llexislatura en materia de política llingüística, ente los que destaquen, amás de la citada Estratexa, l'aprobación de les primeres Instrucciones relatives a los criterios llingüísticos a emplegar nel ámbitu de l'Alministración del Principáu d'Asturies y el so sector públicu.