La cultura sidrera asturiana, ratificada como candidata española a Patrimoniu Mundial Inmaterial de la Unesco

UVIÉU, 25 Oct. (EUROPA PRESS) -

La cultura sidrera asturiana va ser la candidata que va presentar España en marzu de 2023 énte la Organización de les Naciones Uníes pa la Educación, la Ciencia y la Cultura (Unesco) pa la so declaración como Patrimoniu Mundial Inmaterial.

Asina lo ratificó de nuevu esti martes el Conseyu de Patrimoniu Históricu Español, na xunta semestral celebrada en Zaragoza, a propuesta de la Conseyería de Cultura, Política Llingüística y Turismu del Principáu.

El Conseyu de Patrimoniu designara hai un añu la cultura sidrera como candidata pa entrar a formar parte de la Llista Representativa del Patrimoniu Mundial Inmaterial. Sicasí, la normativa de la Unesco torgó que s'evaluara nel ciclu 2022-2023 pol qu'establez un cupu anual de 55 candidatures a estudiar del total de les presentaes, amás de conceder preferencia a les naciones poco o nada representaes nuna Llista de Patrimoniu Mundial Inmaterial, na qu'España tien yá 20 elementos inscritos.

El Gobiernu d'Asturies yá avanzó en xunetu que la evaluación de la so propuesta diba aplazase hasta 2023. El procedimientu esixe que'l Conseyu de Patrimoniu Históricu Español designe cada añu la representación del país qu'opta a esti reconocimientu, polo qu'adoptó de nuevu esti alcuerdu na so xunta de güei, na que tomó parte'l director xeneral de Cultura y Patrimoniu, Pablo León.

L'espediente ellaboráu pol Principáu, coles actualizaciones correspondientes a les acciones desenvueltes a lo llargo del últimu añu, va volver rexistrase énte la Unesco en marzu de 2023.

El llogru d'esti reconocimientu internacional a la cultura sidrera reforciaría la estima que la comunidá siente hacia'l so productu más identitariu. Contribuyiría tamién de manera decisiva a promocionar el respetu por unes práctica y tradiciones qu'otorguen sostenibilidá al mundu rural autóctonu. Amás, ayudaría a revitalizar les actividaes agraries vinculaes la producción de la bébora y a dinamizar el sector, amás d'impulsar les actividaes turístiques y hosteleres.