Desarrollu Rural prohíbe la estracción del oriciu mientres dos años

MR ELPHICK / QMUL

UVIÉU, 20 de Setiembre (EUROPA PRESS)

La Conseyería de Desarrollu Rural y Recursos Naturales alertó, per mediu d'una resolución nel Boletín Oficial del Principáu d'Asturies (BOPA), de la mala situación na que s'alcuentra la población del oricio nes agües asturianes. Según consta nel Boletín, desapaecieron los bancos "más importantes" de la especie, colo que'l Gobiernu decidió prohibir la so estracción mientres dos años.

Los últimos estudios sobre l'estáu del oriciu determinen que dichu recursu nun se recuperó, magar introducise una veda d'ocho meses al añu. Sicasí, la situación del recursu güei ye "mala", con un "importante descensu" de la biomasa esplotable y la desapaición de los bancos más importantes.

Por ello, los estudios científicos aconseyen adoptar la midida d'una veda, hasta que s'aprecie una recuperación de la biomasa y de la estructura poblacional de los bancos que faiga posible una esplotación sostenible nel tiempu.

Asina consta na resolució npola que s'establecen midíes en relación cola estracción de la anémona de mar o 'ortiguilla' (Anemonia viridis) y l'oriciu (Parecentrotus lividus) consultada por Europa Press.

La limitación establez que la estracción d'anémona de mar va realizase "puramente" a pie na zona intermareal de la mariña. Coles mesmes, lo mesmo pa mariscadores profesionales como recreativos, va imponese una veda total de dos años pa la estracción del oriciu (Paracentrotus lividus), revisable en función del estáu del recursu.

El documentu acuta amás el cupu máximu diariu d'estracción de l'anémona de mar o 'ortiguilla' de 20 kilos por mariscador, asina como una veda pa la estracción de la anémona de mar o ortiguilla del 1 d'abril al 31 de mayu.

La decisión básase en que nos últimos meses prodúxose na mariña del Principáu d'Asturies una subida "bien importante" de la estracción d'anémona. "Teniendo en cuenta'l reciente interés por esti recursu, y atendiendo al principiu básicu de precuru na esplotación del mesmu, ye preciso adoptar una serie de limitaciones col fin de nun comprometer la so sostenibilidá nel tiempu", señala la resolución.