Dimite parte de la directiva del Candás C.F., tres denunciar el presidente que-y robaron el dineru de la llotería

UVIÉU, 20 de Xineru (EUROPA PRESS)

   La cúpula de la directiva del Candás Club de Fútbol presentó esti vienres la so dimisión formal, un día dempués de que'l presidente del club, Iván Sampedro, denunciara ser oxetu d'un robu a manes d'unos encapuchaos que lu agredieron y arrampuñáron-y ente 4.000 y 5.000 euros. Con esta cantidá, disponíase a pagar les papeletes vendíes pol club y premiaes con 24 euros na Llotería del Neñu.

   Asina lo confirmó en declaraciones a Europa Press ún d'estos directivos, que destacó la "mui difícil" situación económica na que s'alcuentra'l conxuntu roxiblancu, asina como les fuertes diferencies de los dimitíos cola xestión del presidente. Sin entrar a opinar sobre les circunstancies de la denuncia, confirmó que l'episodiu del xueves foi la gota que colmó'l vasu.

   Concretamente, presentaron la dimisión dos vocales y los dos tesoreros del club, que, xunto col presidente, yeren los que mayor implicación teníen nos llabores de xestión de la entidá deportiva. El directivu en cuestión señaló que la situación, no que se refier a la Llotería del Neñu, yera insostenible.

   Les papeletes vendíes pol Candás (desconocía'l númberu total) tán premiaes con 24 euros, y hasta'l momentu fueron "mui poques" les que se pagaron, señala esti directivu, qu'asegura tar pasando mui malos momentos pola presión de la xente que pide l'abonu d'esta cuantía. "Ye normal que la xente quiera cobrar esi dineru, hai una crisis", señala.  

   El directivu espresó la "tristeza" que-y causa dexar el club, asina como'l so reconocimientu "al cuerpu técnicu, a la plantiya y al 'Chuli' (utillero)", que "siempre tuvieron ehí, sin poner nenguna pega". "Merécense un homenaxe", afirmó. El Candás Club de Fútbol alcuéntrase nestos momentos nel sestu puestu de la clasificación de tercer división, a un solu puntu de los puestos de promoción a Segunda B. Esti domingu enfréntase al Covadonga nel campu La Mata.