Eduardo San Vicente gana'l XVII Concursu Internacional de Semeyes La Sidra cola obra 'Gotes que cuenten hestories'

EDUARDO SAN VICENTE

   UVIÉU, 27 Oct. (EUROPA PRESS) -

   El fotógrafu rioxanu Eduardo San Vicente consiguió'l primer premiu del XVII Concursu Internacional de Semeyes 'La Sidra', dotáu con 700 euros en metálicu y la Medaya d'Oru de la Confederación Española de Fotografía (CEF). Ganolu pola so obra 'Gotes que cuenten hestories: escanciando tradición', una imaxe que capta con gran fuercia espresiva'l momentu del escanciáu, símbolu por escelencia de la sidra asturiano.

   Esti concursu ta entamáu pola Fundación Asturies XXI col patrociniu del llagar Sidra JR y cola collaboración téunica de la Asociación Asemeyando. El númberu participantes caltúvose en cifres asemeyaes a les de la edición pasada, reafitando la consolidación d'esti certame como una de les principales referencies internacionales dedicaes a la cultura sidrera dende l'ámbitu artísticu y fotográficu.

   El segundu premiu, con 200 euros en metálicu y la Medaya Plata de la CEF, recayó en Juan Carlos Hernández Fernández pola so obra "Siempres ta con nós", mentantu que'l Tercer Premiu, dotáu con 100 euros en metálicu y la Medaya Bronce de la CEF, foi pa Francisco J. Domínguez García pola semeya 'Sidre cardiosaludable'.

   La Mención Especial 'Sidra JR', que inclúi 100 euros en metálicu y dos caxes de Sidra JR, concedióse a Óscar Chamorro Flórez pola so obra "Llavaeru botelles", una mirada nostálxica y sensible al trabayu artesanal nos llagares asturianos.

   El xuráu del concursu tuvo presidíu pol fotógrafu asturianu Luis José Vigil-Escalera, 'Lujó Semeyes', Maestru de la Confederación Española de Fotografía (M CEF) y Excelencia FIAP (Federación Internacional del Arte Fotográfico), autor con una amplia trayeutoria espositiva y docente, y con numberoses distinciones en certámenes nacionales y internacionales.

   La entrega premios y la naguración de la esposición coles obres gallardonaes y finalistes va cellebrase na Sidrería La Galana (Plaza Mayor de Xixón) el 15 de payares. Dempués, la muestra formará parte de la esposición itinerante "Semeyes de LA SIDRA", que percorrerá distintos espacios sociales y culturales a lo llargo del prósimu añu.

   El concursu y les esposiciones venceyaes desendólquense gracies al sofitu del llagar Sidra JR y cunten cola subvención de la Conseyería de Cultura, Política Llingüística y Deporte del Principáu d'Asturies, que impulsa la promoción del padremuñu sidreru como una espresión viva de la identidá y la cultura asturiana.