Educación afirma nun tener constancia de llibros de testu que traten al asturianu como dialectu o llingua muerta

UVIÉU, 26 Sep. (EUROPA PRESS) -

La Conseyería d'Educación nun tien constancia de llibros de testu que falen del asturianu como un dialectu o como una llingua muerta. Con too, nel casu de qu'esto fuera asina se pondríen en contactu cola editorial pa correxir esa "incorrección manifiesta".

Asina lo indicó la conseyera del ramu, Lydia Espina, na so comparecencia na Xunta Xeneral pa informar del so programa de gobiernu. Foi énte una entruga de la diputada de Podemos Asturies, Covadonga Tomé, qu'esplicó qu'hai dellos profesores que-yos treslladaron la existencia de llibros de testu d'árees como 'Lengua Castellana' o 'Geografía y Historia' que recueyen "comentarios inexactos y obsoletos" sobre la realidá llingüística d'Asturies.

Nesi sentíu, entrugada sobre si dende'l Principáu diben tomar dalguna midida pa iguar esta situación, Espina esplicó que son los centros educativos, dientro de la so autonomía de xestión, los qu'escueyen los materiales y que dende la Conseyería nun revisen los llibros de testu, porque "los publiquen les editoriales y entendemos que tán fechos con tol rigor".

Con too, la conseyera esplicó que nun tienen constancia de qu'haya dalguna "incorrección manifiesta" sobre la realidá llingüística d'Asturies, pero que si esto ye asina, dende Educación podríen escribir a la editorial pa que se rectificara "si hai dalguna errata o dalgún datu incorrectu".