Educación pon nomes n'asturianu a los catorce centros de nueva creación de la fase 2 de la rede de Les Escuelines

   UVIÉU, 9 Abr. (EUROPA PRESS) -

   La Conseyería d'Educación punxo nomes oficiales n'asturianu a los catorce centros de nueva construcción previstos na fase 2 del esplegue de la rede autonómica, pública y gratuita de Les Escuelines p'alumnáu de 0 a 3 años. Según informen dende la conseyería, la denominación supon el pasu previu a la so creación alministrativa, que tendrá d'aprobar el Conseyu de Gobiernu.

   Al traviés d'una nota de prensa'l Gobiernu incide en que al igual qu'asocedió coles 31 escuelines de la fase 1, la conseyería encargóse de buscar nomes autóctonos, atendiendo a les peculiaridaes de cada conceyu. Darréu, les denominaciones propuestes consensuáronse colos conceyos.

   Los nomes son de procedencia variada, anque predominen los alusivos al mundu infantil y los xuegos tradicionales (Los Rebusquinos, Los Pericos, El Boliche, Trebeyos, Cucurrabucu) y a la flora y la fauna (Los Ablaninos, La Cerezal, Les Curuxines, La Foquina).

   Hai un topónimu, La Xungarosa, que ye como se conoz tradicionalmente al barriu avilesín de La Lluz, y dos alusiones a la hestoria local: Los Condalinos, en Noreña, y Los Vaqueirinos, en Tinéu.

   A lo último, dos escuelinas d'Uviéu lleven el nome del matrimoniu formáu por Pinón y Telva, los dos personaxes creaos pol dibuxante Alfonso Iglesias.

   Per otru llau, la fase 2 de la rede educativa inclúi la creación d'unidaes en cinco escueles municipales yá esistentes. Trés d'elles tienen un nome propiu: La Oliva (Villaviciosa), La Marinera (Carreño) y Pinín (Navia), ente que les otres dos caltienen, pel momento, el del conceyu: El Franco y Pravia.