L'esbardu recoyíu en Proaza en mayu va quedar en llibertá nel Parque Nacional de los Picos d'Europa

UVIÉU, 30 Oct. (EUROPA PRESS) -

La cría d'osu cantábricu recoyida a finales de mayu en Proaza, conocida como Saba, va reintroducise nel Parque Nacional de los Picos d'Europa nos díes próximos. El principal motivu pa devolvela al mediu natural ye pa que s'aclimate a la redolada enantes de pasar al periodu d'envernía.

Según informó l'Executivu, los equipos técnicos del Principáu, el Gobiernu de Cantabria y la Xunta de Castiella y Llión, col apoyu del Ministeriu pa la Transición Ecolóxica, trabayaron de forma conxunta, al traviés de protocolos comunes, y peracaben l'operativu necesario pa la suelta del animal.

La lliberación va facese en condiciones de cuidáu estremu y ensin contactu con humanos p'aumentar les posibilidaes d'éxitu de la reintroducción nel mediu natural. D'esta manera, la zona de la suelta escoyóse n'analizando múltiples variables, ente les que destaquen la disponibilidá d'alimentu y la baxa presencia de persones.

Coles mesmes, el so treslláu al núcleu oriental del cordal cantábricu podría contribuyir a conectar la población osera presente nesta área, non mui numberosa, cola del occidente, muncho más estabilizada.

L'esbardu pasó l'últimu mes y medio nun recintu en semillibertá nel monte de Valsemana, en Llión. Nesti tiempu, siguió recuperando pesu -espérase que supere los 35-40 quilogramos- y muestra un comportamientu d'alerta y busca activa d'alimentu, polo que presenta condiciones óptimas pa la fase final de tresporte y lliberación nel mediu natural. Estes instalaciones, un espaciu aislláu, ampliu y con un afayadizu arriquecimientu ambiental, facilitaron l'aclimatación del animal.

La Guardería de Mediu Natural del Principáu, en collaboración con técnicos especializaos, recoyó a la cría na contorna osera de Proaza. Tenía desnutrición, deshidratación y alteraciones neurolóxiques y unviáronla a un centru veterinariu pa estabilizala.

N'esperimentando una meyora leve, alcordóse'l so treslláu al Centru de Recuperación de la Fauna Montesa, en Cantabria, unes instalaciones específiques pal tratamientu d'osos pardos.

Nos trés meses que permaneció ellí, tuvo baxu control permanente y especializáu, anque ensin contactu visual colos sos cuidadores, y algamó un desarrollu óptimu, hasta llegar a los 23 quilogramos de pesu. Nesi momentu, el setiembre pasáu, treslladóse al recintu de Valsemana como pasu previu a la so reintroducción nel mediu natural.