La Feria de Muestres acueye'l IV Día de la Llingua Asturiana'l 16 d'agostu

   OVIEDO, 8 Ago. (EUROPA PRESS) -

   El recintu ferial Luis Adaro, qu'estos díes acueye la 68 edición de la Feria Internacional de Muestres d'Asturies, va celebrar el sábadu 16 d'agostu'l IV Día de la Llingua Asturiana. Esta cita entámenla en conxuntu la Cámara de Comerciu de Xixón y l'asociación Iniciativa pol Asturianu col sofitu de más d'una decena de instituciones collaboradores.

   Nuna nota de prensa, Iniciativa apunta que la llista d'actividaes recueye una bayura d'actividaes en diferentes espacios que pretenden faer d'esti día una xornada festiva pero tamién de concienciación y reivindicación llingüística.

   El día del asturianu na Feria de Muestres va entamar enantes del meudía, a les 11.30 hores, cola inauguración institucional, que va cuntar con una apertura musical con gaita asturiana y el pregón de la periodista Inés Paz.

   Darréu d'ello, van tener llugar les intervenciones d'Álvaro Alonso, secretariu xeneral de la Cámara de Comerciu de Xixón y director de la Feria de Muestres; Ana Vanessa Gutiérrez, conseyera de Cultura, Política Llingüística y Deporte del Gobiernu del Principáu d'Asturies; y de la presidenta d'Iniciativa pol Asturianu, Arantza Margolles.

    Dempues va facese una visita al espaciu de la organización nel eventu pa conocer a les diferentes firmes qu'acompañen a l'asociación a lo llargo d'estos díes. A les 13.00 hores va facese l'homenaxe a la figura del escritor recientemente fallecíu Xuan Bello, amás d'otres actividaes que van prolongase pela tarde tamién.

   Ente elles la proyeición del vidiu Madrellingua, un alderique col vocal d'Empresariáu y Consumu d'Iniciativa pol Asturianu, Inaciu Iglesias, acerca de cómo l'asturianu puede convertise nuna ferramienta de xeneración d'empreses, empléu y polo tanto riqueza y tamién un showcooking con Panduru centrau na sidra y el pan.

   De magar les 18.00 hores, el Muséu del Pueblu d'Asturies va acoyer una visita guiada n'asturianu a les sos instalaciones y el Conceyu de Mieres entama una charra sobre la historia de La Danza Prima.

   Les actividaes vuelven al espaciu d'Iniciativa pol Asturianu a les 18.30 hores cola presencia de Pablo Rodríguez Medina, que va firmar el so llibru 'El pesu de la nieve', ganador de la IV edición del premiu Andrés Solar, que cuenta la historia de Martinón, un pastor que vive nos montes de Ponga.

   A les 19.00 hores, l'espaciu de promoción turística, Conceyos con Encantu, qu'abelluga a 21 conceyos asturianos, entama l'actividá 'Atopa'l to pueblu' na que los visitantes van colocar un puntu la so collación nun mapa d'Asturies.

   La xornada va finalizar con una semeya colectiva cola pancartona d'Iniciativa pol Asturianu col mensaxe de 'La sociedá asturiana axúntase pola oficialidá' delantre del Palaciu de Congresos de Xixón.