El Festival de la Cerveza d'Avilés vuelve del 8 al 14 d'agostu con horarios nuevos y carpa infantil

   UVIÉU/AVILÉS, 6 Ago. (EUROPA PRESS) -

   El Festival de la Cerveza d'Avilés na so 29 edición, entamada pola sociedá El Mercáu d'Avilés, va celebrase del 8 al 14 d'agostu na Pista de La Esposición en Les Meanes. Siete díes de fiesta gastronómica y música onde la protagonista ye la cerveza nes sos múltiples variedaes, tanto asturianes como nacionales y d'importación.

   Según informa la organización, el d'Avilés ye'l que mayor númberu de referencies cerveceres axunta de tolos que se celebren nel norte d'España. Va cuntar con 28 stands, 18 de cerveza y 10 d'alimentación, una gran carpa central onde s'alluga la terraza cubierta y desenvuélvense actuaciones musicales en vivu, porque tolos díes podrá disfrutase de conciertos con dos pases diarios a les 20.30 y a les 22.30 hores.

   De nuevu anguaño, tres de la gran acoyida nos seis anteriores, los clientes que lo deseyen van poder adquirir la Jarra conmemorativa del Festival, cola que van poder dir polos puestos pa pidir la cerveza que quieran y llevase, al rematar, una alcordanza d'esta edición.

   La conceyala de Turismu y Mercaos, Raquel Ruiz, y el xerente d'El Mercáu d'Avilés, organizador del Festival, Hugo Martínez, presentaron en rueda de prensa la programación del certame y visitaron los trabayos de montaxe de los puestos.

   Anguaño, pa favorecer la conciliación de la fiesta y el derechu al descansu de los vecinos de la redolada, tal como se comprometió l'equipu de gobiernu, amenorgáronse los horarios de forma que de domingu a xueves va ser de seis de la tarde a doce de la nueche (18.00 - 00.00 hores) y el vienres y el sábadu, media hora más: de seis de la tarde a doce y media de la nueche (18.00-00.30 hores).

   Amás, nel recintu cúntase con una carpa infantil onde los y les menores de 10 años van poder pasalo guapamente saltando en cames elástiques mientres les families disfruten de la fiesta.