BONOS AIRES, 10 de Payares (EUROPA PRESS/Rafael Saralegui)
El fiscal federal Federico Delgado pidió al xuez federal Daniel Rafecas que cite a prestar declaración como sospechosos de fraude a directivos de la empresa Aerollinies Arxentines pola supuesta sobreventa de pasaxes demientres les últimes vacaciones d'iviernu, informa la prensa llocal.
"L'avance de la investigación permitió acreditar, col grau de certeza que requier esta etapa preliminar del procesu, que demientres el primer semestre del añu 2008, les empreses Aerollinies Arxentines SA y Austral SA, en manes del grupu Marsans/Interinvest SA, vendieron abondos pasaxes sabiendo que cola infraestructura opoerativa disponible enxamás diben poder cumplir los sos compromisos asumíos polos que recibieron importantes sumes de dineru de parte de los usuarios", diz el dictame, informa'l portal Infoabae.
El grupu Marsans lleva alantre un trabayáu procesu de venta de les aiciones d'Aerollinies Arxentines y Austral al Gobiernu arxentín y dende mediaos d'añu la conducción de les compañíes ta a cargu d'un director que representa al Gobiernu.
"En definitiva ta claro que'l Grupu Marsans cometió un claru fraude, y que'l costu, a lo último, tuvo qu'asumilu l'Estáu Nacional", indicó.
"La maniobra ye más que l'incumplimientu del contratu que lliga al concesionariu col usuariu, puesto que se trató d'un plan bien maduráu d'antemano, dirixíu a aumentar la tasa de ganancia sabiendo que nesi precisu momentu de baxa actividá ivernal, colos usuarios in situ reclamando, ante l'incumplimientu previamente preparáu, l'Estáu diba facer lo necesario --lléase desembolsar dineru públicu-- pa garantizar el serviciu", argumentó'l fiscal Delgado.
En momentos en que la compañía entró práuticamente en suspensión de pagos, l'Estáu arxentín, que ye aicionista minoritariu, entamó a ingresar fondos pa pagar sueldos adeudaos, comprar combustible, repuestos y saldar tases y seguros pendientes de pagu.
El fiscal caltuvo que les irregularidaes "esteriorizáronse demientres el primer fin de selmana de les vacaciones d'iviernu del mes de xunetu del 2008, cuando les estaciones aérees Aeroparque y Ezeiza fueron testigos de la furia de lo susuarios que pagaren por un serviciu que'l so proveedor conocía d'antemano, esto ye, al momentu de vender el serviciu, que nun diba cumplir".
El fiscal afirmó que la flota total de les dos empreses sumaba 70 aeronaves, pero que sólo taben en funcionamientu unos 30 pese a lo cual siguieron vendiéndose pasaxes a sabiendes de que nun se diba poder cumplir colos servicios contrataos.