Fosterlang: asina ye'l nuevu proyeutu européu pa impulsar les llingües minorizaes

   UVIÉU, 20 May. (EUROPA PRESS) -

   La Rede Europea d'Igualdá Llingüística (ELEN), entidá a la que pertenez Iniciativa pol Asturianu, ta acabante d'anunciar el llanzamientu de Fosterlang, entituláu 'Promocionando'l capital llingüísticu: una fueya de ruta pa revertir la crisis de diversidá y activar beneficios sociales n'Europa'.

    Según esplica Iniciativa Pol asturianu n'una nota de prensa enviada esti martes, trátase del "nuevu proyeutu insinia européu", entamáu el primeru de mayu, y que cunta con un presupuestu de 3 millones d'euros "pa dar puxu a llingües minorizaes y promocionar el capital llingüísticu européu".

   El proyeutu, financiáu pola Comisión Europea so'l programa Horizonte Europa, quier tener un efeutu tresformativu en cómo'l capital llingüísticu ya humanu de los falantes de llingües minorizaes y migrantes ye reconocíu, valoráu ya reforzáu pa beneficiu de les sos comunidades y d'Europa en xeneral.

   El proyeutu ta formáu por un consorciu de 14 instituciones y 48 comunidaes llingüístiques que combinen la so especialidá en llingüística decolonial, política llingüística, recuperación llingüística, antropoloxía social, educación plurillingüística y pedagoxía, planificación llingüística y tecnoloxía de la innovación. Fosterlang incluirá estudios comparativos, desenrollos ente casos ya implementaciones piloto de soluciones práutiques.

   Tal y como detallen, unu de los mayores resultaos sedrá una Fueya de Ruta del Capital Llingüísticu, qu'afitará delles recomendaciones sustanciales con estratexes efeutives y significatives a curtiu, mediu y llargu plazu pa promocionar el capital llingüísticu d'Europa y protexer les llingües minorizaes.

   "Tamos encantaos de poner Fosterlang a trabayar y de tener el sofitu d'Horizonte Europa. Ta destináu a ser un proyeutu européu insinia clave pa guiar polítiques llingüístiques na Unión Europea nos vinientes años. Como la principal organización representante de llingües europées minorizaes y en peligru, ye vital disponer d'investigación concreta y precisa p'ayudanos a ser más efeutivos na nuesa campaña pa protexer les nueses llingües", declaró l'secretariu-xeneral d'ELEN, Davyth Hicks.

   Hicks dixo que con Fosterlang, trabayaron con un equipu punteru d'espertos llingüísticos a nivel mundial con un ampliu rangu d'esperiencia. "Pa nós, ye importante tener esta alianza ente la sociedá civil ya'l mundu académicu, especialmente no tocante a obtener mensaxes clave del proyectu pa les nueses comunidaes llingüístiques a nivel base", comentó.

   Na suopinión, ún de los resultaos más importantes del proyeutu sedrá la Fueya de Ruta de Capital Llingüísticu y les recomendaciones arreyaes que presentaremos a la Xunión Europea, les Naciones Xuníes, el Conseyu d'Europa, la Organización pola Seguridá y la Cooperación n'Europa (OSCE), la UNESCO y los gobiernos al cabu'l proyectu.

   El proyectu centraráse en promocionar el capital llingüísticu non sólo dende la perspectiva de protexer la diversidá llingüística, sinon tamién amosar cómo falantes de llingües diverses pueden fomentar los componentes económicos, demográficos, sociales y de salú del capital humanu.