'Frozen' ye yá la película d'animación más taquillera de la hestoria

DISNEY

MADRID, 31 Mar. (EUROPA PRESS) -

Dempués del so estrenu en Xapón, onde la cinta llanzóse esti fin de selmana, 'Frozen: El reinu del xelu' convirtióse na película d'animación más taquillera de la hestoria.

Colos 50,5 millones de dólares que la película de Disney recaldó na fin de selmana del so estrenu nos cines del país nipón, Frozen yá atropa más de 1.072 millones de dólares superando asina la marca de Toy Story 3 que yera hasta la fecha la cinta d'animación más taquillera de la hestoria con más de 1.063 millones de dólares.

Elsa, Anna, Kristoff, Sven, Olaf y tola familia de Frozen asitiáronse nel décimu puestu de les cintes más taquilleres de la hestoria y yá son el tercer mayor ésitu de taquilla pa Disney solamente superaos por 'Iron Man 3' y 'Los Vengadores'.

La película de Disney alzóse amás con dos premios na última ceremonia de los Oscar, llogrando'l premiu a la meyor película d'animación y el de meyor cantar, pola so tema central Let It Go.

Inspirada en La Reina de les Nieves, el cuentu de Hans Christian Andersen, Fozen ye una comedia d'aventures na qu'una profecía conderga a un reinu a un iviernu eternu, asina qu'Anna, una optimista redomada, xúnese a Kristoff, un temerariu montañeru y al so compinche'l renu Sven.

Xuntos entamen un viaxe épicu en busca d'Elsa, Reina de les Nieves, pa poner fin al xelizu conxuru. Pel camín, Anna y Kristoff van atopar con duendes místicos, un risonderu moñecu de nieve llamáu Olaf, temperatures estremes propies del Everest y muncha maxa. Van vese obligaos a lluchar contra los elementos pa salvar al reinu de la destrucción más absoluta.