Fuegos, fogueres y tradición: TPA vive güei la nueche máxica d'Asturies

   UVIÉU, 23 Jun. (EUROPA PRESS) -

   Televisión del Principáu d'Asturies (TPA) va emitir esti llunes 23 de xunu, a partir de les 22.45 hores, un programa especial de Conexión Asturies dedicáu a la nueche de San Xuan.

   El programa va percorrer en directu los actos centrales en Mieres, Corvera y Amandi (Villaviciosa), xusto nel momentu que les fogueres amburen pa marcar el tránsitu simbólicu escontra'l branu.

   Presentáu dende plató por Graciela Lobo, el programa va cuntar coles conexones d'Isabel Lafuente, María Ruisánchez y César Andrino. En Corvera, la programación nocherniega va empezar col pasacalles de la Banda de Gaites de Corvera a les 23.00 hores, antes d'empecipiar el ritual de quema de la gran Foguera 'Sidra', una escultura de cinco metros d'altor que representa una botella y un vasu de sidra, obra de Mónica Álvarez y Alberto Colino.

   L'encendíu del fueu nel área recreativa de Overo, xuntu al horru, va ser un homenaxe a la sidra asturiana, declarada Patrimoniu Cultural Inmaterial de la Humanidá en 2024.

   En Mieres, los fueos artificiales van allumar el cielu como antoxana d'unu de los actos más esperaos: la quema de la tradicional Foguera de San Xuan na plaza del Conceyu, encendida pol Grupu Folclóricu Prau Llerón. La danza prima va acompañar el ritual, nel que vecinos y visitantes arrodien el fueu.

   Pela so parte, Amandi (Villaviciosa), va representar a la nueche de San Xuan más rural, la de toos aquellos pueblos d'Asturies que se xunten en redol al fueu qu'abre les puertes del branu. La foguera va prendese tres la interpretación de la Danza de San Xuan d'Amandi, una coreografía tradicional compuesta en 1957 y que se caltuvo como ún de los emblemes del folclore del conceyu.

   Pero non solo Mieres, Corvera y Amandi van ser les protagonistes de la nueche. El espectadores de Conexón tamién van tener un papel bien importante faciendo llegar les sos imaxes, vídeos y fotografíes de les fogueres que van prendese por toa Asturies. A lo llargo del programa especial van percorrese les fogueres d'otres localidaes del Principáu como L'Arena, Lluanco, Avilés, Uviéu o Xixón.