El Gobiernu asturianu alvierte del posible zarru de TPA por sentencies que la obliguen a asumir emplegaos de productores

Estudia enatmar acciones xudiciales contra los directivos por "incumplir normatives de contratación"

UVIÉU, 7 de Marzu (EUROPA PRESS)

El Gobiernu d'Asturies alvirtió esti miércoles del posible zarru de la radio televisión pública autonómica pola existencia de "más de 40 demandes por "cesión illegal de trabayadores", de les que se derivaron "ocho o diez" sentencies qu'otorguen a trabayadores d'empreses productores subcontrataes el derechu a incorporase a la plantiya del ente.

Nuna rueda prensa na que refugó responder a preguntes sobre otros asuntos d'actualidá, el viceconseyeru de Sector Públicu, Luis de la Vallina, esplicó qu'esta situación, susceptible d'empeorar, súmase a "una delda reconocida de 18,9 millones", "mui superior a les retenciones acordaes pol Gobiernu d'Astuires", de 11,3 millones d'euros, colo que la situación económica ye "inasumible".

De la Vallina aseguró que se trata de "dos situaciones gravísimes", que vinculó a "una nefasta xestión del ente y de les sos sociedaes", per parte de los sos responsables, contra los que'l Gobiernu estudia entamar acciones llegales.

De momentu, el voceru del Executivu señaló que dende'l Gobiernu d'Asturies diéronse instrucciones al actual director, Antonio Virgili, pa que ponga fin a la situación que motivó les demandes por cesión illegal de trabayadores, anque alvirtió que "el mal yá ta fechu" y "el panorama ye negru".

MÁS DE 200 DEMANDES

Asina, alertó qu'estos incumplimientos de "la normativa llaboral" podríen derivar en "más de 200 demandes d'equí a un periodu non mui alloñáu", coles que "los trabayadores cedíos illegalmente puen pasar a selo del ente de Comunicación".

De siguío, criticó que l'anterior responsable de la cadena, Juan José Guerenabarrena, "tapeciera" la verdadera situación que traviesa RTPA, "hasta na Comisión de Control del Ente Públicu de la Xunta Xeneral del Principáu", onde, amás, aseguró que "negó la existencia de fraude algún, reconociéndolo sólo dempués de que la diputada -Cristina Coto- manifestara que tenía nel so poder trés sentencies".

De la Vallina, qu'entregó les sentencies que se conocen y que son contraries a la Radio y Televisión del Principáu d'Asturies por illegalidá na contratación de trabayadores, informó que'l Gobiernu tuvo conocencia d'esta situación recientemente, por mor de la información ofrecida a los miembros del conseyu d'alministración del Ente.

GUERENABARRENA, ¿CONOCEDOR?

Por too ello, considera que "Guerenabarrena yera necesariamente conocedor de les práctiques de cesión illegal de trabayadores que se desarrollaben dende diba años ente la TPA, nun siendo neglixencia absoluta o grave nel exerciciu de les sos funciones".

Nes sentencies destácase que trabayadores de subcontrates dependíen puramente de la empresa principal, sobremanera no relativo a disposición horaria. Amás, De la Vallina calcó en qu'ún de los trabayadores, el que dio llugar al entamu de les actuaciones de la Inspección de Trabayu pola so situación llaboral, "llegó a formar parte de los servicios mínimos de la TPA mientres la güelga de marzu del 2010".

La sentencia del Xulgáu de lo Social númberu 1 de Xixón remata dando la razón a los trabayadores declarando qu'existe una cesión illegal de trabayadores, que va dar derechu a éstos a escoyer en cuála de los dos empreses quieren alquirir la condición d'empleaos.

Pela so parte, el fallu de la Sala de lo Social del Tribunal Superior de Xusticia d'Asturies (TSXA) que ratifica l'anterior alude a "una maniobra de TPA pa evitar la consolidación d'un puestu de trabayu per mediu los subterfuxos d'obligar primero a los trabayadores a constituyir una sociedá y ascribirse dempués a una empresa que nun pon nada na contratación que se diz caltener con TPA".

"Esta situación, xenerada pol anterior Gobiernu y equipu directivu de la RTPA, ha ponese en conocimientu de la opinión pública, con carácter previu a la campaña electoral, col fin de dar a conocer les práctiques siguíes en materia de contratación dientro de la RTPA y de les que namás tuvo conocencia l'actual Gobiernu dio instrucciones con cuenta d'eliminar de manera radical les mesmes", acabó.