El Gobiernu asturianu confía en dar un anunciu "inminente" d'un acuerdu pa meyorar les conexones aérees nacionales

MADRID, 21 de Xineru (EUROPA PRESS)

El presidente d'Asturies, Vicente Álvarez Areces, anunció güei na so visita a la Feria Internacional de Turismu (Fitur) que'l Gobiernu autonómicu confía en poder anunciar "de forma inminente" dalgún compromisu nuevu nel ámbitu promocional qu'ayude a meyorar los tráficos aéreos y les conexones colos vuelos con destín nacional que parten del aeropuertu d'Asturies.

Álvarez Areces, qu'encabezó la delegación institucional que güei visitó'l recintu ferial Juan Carlos I con motivu del Día de la Comunidá, esplicó que nes últimes selmanes y nel trescursu de la Feria incrementáronse los contactos con operadores aéreos.

A entrugues de los periodistes, el xefe del Executivu esplicó que l'aeropuertu asturianu superó yá nel 2008 les previsiones de viaxeros d'Aena pa esti añu 2010, al algamar la cifra de 1,5 millones. Según los sos datos, nel 2009 el volume de pasaxeros baxó un 14 por cientu, hasta asitiase nun 1,3 millones "como consecuencia de la crisis y pola meyora de la ufierta de viaxe por ferrocarril".

Sicasí, esclaró que'l papel del Gobiernu ye actuar nel ámbitu de les campañes promocionales, dao que son les compañíes les que deben poner los aviones y los slots y les que tienen "dificultaes". Sorrayó, amás, que pese a les llendes normatives pa la promoción del sector aereu, los tráficos pasaron nos últimos años de dos destinos nacionales y tres internacioanles, a los doce nacionales y los seis internacionales, ún con carácter temporal, en serviciu güei.

Demientres la so intervención, nel estand d'Asturies na Feria, el presidente tuvo acompañáu pola conseyera de Cultura y Turismu, Mercedes Álvarez, y la directora rexonal de Turismu, Elisa Llaneza. Amás, asistieron al actu la presidenta de la Xunta Xeneral del Principáu, María Jesús Álvarez; el delegáu del Gobiernu n'Asturies, Antonio Trevín; el presidente de la FADE, Severino García Vigón; y una nutrida representación d'alcaldes, ente la que taba l'alcaldesa de Xixón, Paz Fernández Felgueroso.