El Gobiernu vuelve convocar mañana a les CC.AA pa tratar la estratexa del llobu, pero Asturies pide aplazalo

UVIÉU/MADRID, 9 Feb. (EUROPA PRESS) -

El Ministeriu de Transición Ecolóxica convocó esti miércoles 10 de febreru a les comunidaes autónomes al grupu de trabayu pa falar de la estratexa de caltenimientu y xestión del llobu ibéricu. Sicasí, Castiella y Llión, Asturies, Cantabria y Galicia, solicitaron l'aplazamientu de la xunta hasta que nun s'esclarien les circunstancies y "irregularidaes" que, al so xuiciu, produciéronse na última xunta de la Comisión Estatal pal patrimoniu Natural y la Biodiversidá, celebrada'l 4 de febreru.

Na xunta de la selmana pasada, na que taben presentes los directores xenerales de patrimoniu natural de les autonomíes, aprobóse llevar a la ministra de Transición Ecolóxica la propuesta d'incluyir toles poblaciones de llobu ibéricu nel llistáu d'especies especialmente protexíes, lo que automáticamente va suponer la prohibición de la caza'l llobu en toa España. Hasta'l momentu, esta protección yá ta a valir pa les poblaciones al sur del Douru, pero non al norte del Douru, onde taba considerada especie cinexética.

Según informaron a Europa Press fontes ministeriales, l'alcuentru d'esti miércoles ye a nivel de técnicos y trátase del grupu de trabayu alcordáu na Comisión de Patrimoniu Natural pa ellaborar la estratexa xunto cola propuesta d'incorporar al llobu ibéricu nel llistáu.