Iniciativa pol Asturianu critica "l'ausencia d'obres n'asturianu" na aplicación eBiblio de biblioteques públiques

   UVIÉU, 13 May. (EUROPA PRESS) -

   Iniciativa pol Asturianu fizo llegar una quexa a la Rede de Biblioteques Públiques d'Asturies por "l'ausencia total d'obres n'asturianu na aplicación dixital de les biblioteques" na que reclamen "una solución a esti arrequexamientu a les creaciones feches nes llingües propies d'Asturies".

   Según espliquen, eBiblio, la aplicación informática de les biblioteques públiques y que permite l'empréstamu en llínia de llibros lletrónicos, audiollibros, revistes y periódicos nun cuenta con conteníos n'asturianu y n'eonaviegu. D'un total de 25.507 archivos disponibles ente vídeos, llibros dixitales, audiollibros, revistes y periódicos nun hai nenguna posibilidá d'esfrutar de conteníos nes llingües propies.

   El suministrador mayoritariu de les llicencies disponibles ye'l Ministeriu de Cultura y solo incorpora documentos nes llingües cooficiales. Nesi sentíu, Iniciativa pol Asturianu considera que l'ausencia de la oficialidá nun ye un argumentu pa nun cuntar con obres n'asturianu -llingua protexida estatutaria y xurídicamente- y solicita al Gobiernu d'Asturies entamar xestiones col departamentu d'Ernest Urtasun pa revertir esta situación.

   Iniciativa pol Asturianu considera inalmisible que les ferramientes dixitales públiques nun garanticen la presencia del asturianu, especialmente cuando sí se fai un esfuerciu por incorporar otres llingües. L'asociación recuerda que la producción lliteraria n'asturianu ye amplia y diversa, y qu'esiste material más que suficiente pa formar parte d'esta plataforma.

   Por esti motivu esixe al Ministeriu de Cultura que corrixa esta situación de manera áxil, incorporando un catálogu dignu d'obres n'asturianu y eonaviego na aplicación dixital de les biblioteques. Amás, reclama que se establezan criterios claros que garanticen la presencia equitativa de les llingües propies d'Asturies en tolos servicios culturales públicos.

   La entidá úfrese tamién a apurrir contactos d'otres entidaes, escritores, creadores o instituciones que pudiesen echar un gabitu pa que les obres n'asturianu y n'eonaviegu tengan presentes dientro de l'aplicación eBilio.