Iniciativa pol Asturianu valora'l respaldu parllamentariu a la creación de la especialidá docente de llingua asturiana

   OVIEDO, 19 Feb. (EUROPA PRESS) -

   Iniciativa pol Asturianu valoró esti xueves "mui positivamente" el respaldu espresáu pola mayoría parllamentaria de la Xunta Xeneral del Principáu d'Asturies a la reclamación pa crear la especialidá docente d'asturianu cola modificación de los Reales Decretos.

   La organización recuerda que la falta d'una especialidá propia pa l'asignatura de Llingua Asturiana vien xenerando dende hai años una situación d'inestabilidá pal profesoráu que redunda na propia materia.

   Iniciativa pol Asturianu señala que la creación de la especialidá docente nun ye solo una cuestión llaboral, sinón una midida imprescindible pa normalizar y ameyorar la enseñanza de les llingües propies asegurarando la igualdá de drechos del alumnáu que escueye cursar la materia. El colectivu considera que l'ausencia d'Especialidá Docente ye una discriminación pa los y les docentes d'asturianu que dempués de tantos años sigue ensin iguase.

   La mayoría parllamentaria de la Xunta Xeneral amosó'l so sofitu a esta reivindicación, lo que supón -según l'asociación- un pasu políticu fundamental pa dar solución definitiva a esta problemática.

   Arantza Margolles recordó que "va unos meses, la mayoría parllamentaria daba una mayoría de sofitu a la oficialidá" y que a día de güei esi sofitu mayoritariu ye pa llograr la Especialidá Docente d'Asturianu de Primaria, Secundaria y Universidaes.

   Por esti motivu reclamó al presidente Barbón qu'asuma "personalmente la defensa d'esta cuestión" y que faiga respetar esa mayoría parllamentaria énte'l Ministeriu d'Educación.

   "La estabilidá del profesoráu ye clave pa garantizar una enseñanza de calidá. Nun podemos siguir con una situación de provisionalidá permanente que perxudica tanto al colectivu docente como al alumnáu" señaló la vocera de la entidá.