Iniciativa recuerda que'l PP de Gabino de Lorenzo foi'l primeru n'usar 'Uviéu'

UVIÉU, 20 Mar. (EUROPA PRESS) -

El presidente d'Iniciativa pol Asturianu, Inaciu Galán, pidió a les conceyalíes d'Uviéu facer un "esfuerciu especial" pa usar el topónimu tradicional de la ciudá, principiando poles redes sociales y pola Muestra de Folclor de la ciudá, onde recuerden que yá s'usaba na época del 'popular' Gabino de Lorenzo.

Foi n'abril del 2018 cuando'l Plenu del Conceyu d'Uviéu, colos votos a favor del PSOE, IX y Somos, y en contra del PP y de Ciudadanos, aprobó la toponimia del conceyu. Un decretu que'l miércoles pasáu aprobó definitivamente'l Conseyu de Gobiernu, polo que pasó a ser tamién oficial la denominación tradicional 'Uviéu' xunto la castellana 'Oviedo'.

Por eso, dende Iniciativa feliciten al conceyu y animen a facer visible la toponimia en tolos ámbitos, pa lo que recuerden que sería "mui positivo, visible y barato principiar a facelo nes redes sociales corporatives del ayuntamientu y de les conceyalíes". Galán reclamó tamién la recuperación de la presencia del idioma n'alcuentros como la Muestra de Folclor d'Uviéu "onde va años yá taba presente".

"Yá col PP de Gabino de Lorenzo el topónimu tuvo dalguna presencia en distintes actividades rellacionaes cola conceyalía de Cultura, pero dempués l'usu del asturianu desapaeció de les actividades municipales, hasta que nesti mandatu últimu volvió a usase", esplicó.