Investigadores del HUCA avancen na selección de célules madre embrionaries pa evitar refugu y formación de tumores

El proyectu contó col apoyu económicu del Institutu Carlos III de Madrid y de la Obra Social de Caxastur

UVIÉU, 3 de Mayu (EUROPA PRESS)

Investigadores del Hospital Universitariu Central d'Asturies (HUCA), que trabayen na 'REDinREN', avancen na selección de les célules madre embrionaries "más óptimes pa evitar que el so refugu o que se formen tumores nos tresplantes".

"Les célules madre embrionaries humanes (hESC) son una importante baza pal futuru de los tresplantes. Estes célules madre son pluripotentes, esto ye, capaces de diferenciase a toles célules y texíos del cuerpu. Pero esto entraña dos riesgos importantes, que crezan incontroladamente y se formen tumores o que l'organismu refugue a estes célules", espliquen los profesionales al traviés d'un comunicáu.

Asina, indiquen que "la clave" atópase nel comportamientu inmunolóxicu d'estes célules, esto ye, "na capacidá d'estes célules madre embrionaries pa desencadenar una reacción inmunolóxicu". "Conociendo esto podríense realizar los cambios necesarios pa que'l sistema inmune del paciente aceptara estes célules y evitar asina'l principal problema nos tresplantes, qu'estes célules se reconozan como estrañes y se refuguen", argumenten.

A esto dedicó'l so esfuerzu investigador l'equipu de científicos que pertenecientes a la Rede d'Investigación Renal (REDinREN) del Institutu de Salú Carlos III del Ministeriu de Ciencia y Innovación desarrollen el so trabayu nel Hospital Universitariu Central d'Asturies (HUCA).

Ello ye que la revista científica 'PloS ONE' acaba de publicar esta investigación que dirixe'l doctor Carlos López-Larrea y realizóla la doctora Beatriz Suárez-Álvarez cola participación de diversos grupos del Centru Nacional de Biotecnoloxía del CSIC (CNB), lo mesmo que de les Universidaes de Sheffield y Michigan. Esti proyectu contó col apoyu económicu del Institutu Carlos III de Madrid y de la Obra Social de Caxastur.

"Hasta agora pensábase que les célules madre embrionaries indiferenciaes podíen tener una propiedaes inmunolóxiques privilexaes, puesto que nestes célules apaecíen unes cantidá bien pequeñes de molécules del MHC", señalen los investigadores de la REDinREN, que descubrieron qu'estos niveles tan baxos de MHC son debíos "a l'ausencia d'unos xenes que tán regulaos por mecanismos epixenéticos, esto ye, por mecanismos que regulen la espresión de los xenes y que nun impliquen un cambiu na secuencia del AND".

Na so investigación repararon amás que determinaes condiciones de cultivu puen condicionar la capacidá de respuesta inmunolóxica cuando estes célules tresplántense a otru individuu. Esto permitiría prever si estes célules va refugales o non el sistema inmune antes de facer el tresplante. "Sería posible poro escoyer de primeres les condiciones más óptimes de cultivu, según les célules más aparentes pa usar en Terapia Celular pa evitar la formación de tumores", destacaron.

"El tratamientu d'estes célules con inhibidores de los mecanismos epixenéticos elevaría la presencia de xenes del MHC, rescatando la inmunoxenicidá, o la capacidá que tien les célules pa desencadenar o provocar una reacción inmunolóxica. Esto sería de gran relevancia en dellos tumores que nun reconoz el sistema inmune, y poro nun puen eliminase, por cuenta de la ausencia de les proteínes del MHC", defenden.

Los resultaos llograos d'esti trabayu nun sólo van permitir avanzar na conocencia de la inmunoxenicidá de les célules madre, sinón tamién "desarrollar nueves estratexes pa inducir la tolerancia, meyorar l'aceptación pol sistema inmune del receptor y evitar la formación de teratomes en futuros desarrollos de terapia celular a partir de célules madre embrionaries", acaben nel escritu.