Israel condena a Fidel Castro por comparar la bandera israelina cola esvástica

XINEBRA, 14 de Xunu (Reuters/EP)

Un voceru del Ministeriu d'Asuntos Esteriores israelín, Yigal Palmor, criticó esti llunes al ex presidente cubanu, Fidel Castro, que comparó la bandera israelina cola esvástica nun testu publicáu pola delegación de Cuba ante'l Conseyu de Derechos Humanos de la ONU (CDH).

"Con estos escandalosos comentarios, Fidel Castro avergoña a los sos antiguos compañeros y los ideales que siempre pretendió defender. El Che Guevara tien que tar revolviéndose na so tumba", afirmó Palmor en declaraciones dende Xerusalem.

Los comentarios de Castro, incluyíos na so columna d'opinión 'Reflexones' publicada'l pasáu vienres, publicáronse polos cubanos a delegaciones y periodistes con vistes a la xunta d'esti llunes en Xinebra del CDH, un organismu compuestu por 47 países y qu'esti llunes debate l'actuación d'Israel nos territorios ocupaos palestinos.

"L'odiu del Estáu d'Israel contra los palestinos ye tal, que nun vacilaríen n'enviar al millón y mediu d'homes, muyeres y neños d'esi país a los crematorios nos qu'esterminaron los nazis a millones de xudíos de toles edaes", caltién Castro nel so artículu.

Castro aseguró que "la cruz gamada del Führer, paeciere ser la bandera güei d'Israel", anque matizó qu'esta opinión "nun naz del odiu" sinón "del sentimientu d'un país que se solidarizó y emprestó agospiu a los xudíos cuando nos díes duros de la Segunda Guerra Mundial, el gobiernu proyanki de Batista trató d'enviar de regresu dende Cuba un buque cargáu d'ellos, qu'escapaben de Francia, Bélxica y Holanda, por causa de la persecución nazi".