L'alcalde de Noreña retira una moción de Conceyu Abiertu por tar escrita n'asturianu

UVIÉU, 08 d'Agostu (EUROPA PRESS)

El grupu políticu municipal de Conceyu Abiertu, nel Ayuntamientu de Noreña criticó duramente al alcalde del Conceyu, César Movilla, pola retirada d'una moción al tar escrita n'asturianu. Trátabase d'una propuesta sobre la rehabilitación del puente ferroviariu de Rebalde.

Al traivés d'una nota de prensa a la que tuvo accesu Europa Press, Conceyu Abiertu señaló que "los motivos argumentaos pol alcalde pa excluyir la nuesa propuesta, basándose en que l'asturianu nun ye oficial nun son válidos, porque en cualesquier casu yá esiste una Llei d'Usu y Promoción de la Llingua Asturiana que nos sos artículos 3 y 4 (Llei 1/1998, d'usu y promoción del bable/asturianu) declaren, afiten y amparen el derechu de tolos ciudadanos al llibre usu del asturianu.

Amás, recuerda que "la propia Constitución Española fala tamién de "Protexer a tolos españoles y pueblos d'España nel exerciciu de los drechos humanos, les sos cultures y tradiciones, llingües ya instituciones"; que l'artículu 9.2 de la mesma Constitución obliga a los poderes públicos a facer lo posible pa que la llibertá y la igualdá del individuu y de los grupos nos que s'inxer sean reales y efeutives".

Asina, Conceyu Abiertu considera "un insultu a la intelixencia de los asturianos pues nun debería ser necesario recordar-y que precisamente el partíu al que pertenez FSA-PSOE gobernó n'Asturies demientres más de 16 años amosando siempres la so refuga dafechu a la declaración del asturianu como llingua oficial. Tuvieron munches oportunidaes pa reformar l'estatutu y declarar 'la oficialidá' pero nun lo ficieron".

La formación ve "mui grave qu'en plenu sieglu XXI continúen sucediéndose en Noreña y Asturies ataques tan importantes a los nuesos drechos llíngüísticos ante los que quedamos desprotexios por unes lleis ambigües como la Llei d'Usu y la propia Constitución Española. Poro, queremos recordar el nuesu determín a favor de la oficialidá de la llingua asturiana.