UVIÉU, 7 Ene. (EUROPA PRESS) -
L'Academia de la Llingua Asturiana (ALLA) afirmó esti xueves qu'hai un "alcuerdu plenu" ente la institución y el presidente Adrián Barbón nel sentíu de "garantizar que nesta llexislatura va algamase la necesaria reforma del Estatutu pa recoyer la oficialidá" del asturianu y del gallego-asturianu.
Asina lo indicaron dende l'ALLA al traviés de nota de prensa depués de que'l xefe del Executivu y el presidente de la institución, Xosé Antón González Riaño, mantuvieren un alcuentru nel Palaciu de Presidencia.
Con too, l'ALLA tresmitió-y al presidente qu'esti procesu de reforma tien qu'entamar nel 2021 "y tien la plena seguranza --l'ALLA-- de qu'esto va ser asina". P'aprobar un Estatutu nuevu na Xunta Xeneral faen falta 27 diputaos y según la institución "nesta llexislatura les fuercies parllamentaries favoratibles a la oficialidá son ampliamente mayoritaries".
Agora, l'Academia va treslladar el resultáu del alcuentru con Barbón a los grupos parllamentarios que, según la so opinión, apoyen "agora mesmo" la oficialidá: FSA, IX, Podemos Asturies y Foru Asturies. "Ábrese un futuru de recuperación llingüística n'Asturies que pue considerase históricu y que va asegurar el futuru del asturianu como llingua de cultura nel Principáu", indicaron dende l'ALLA.
Otra manera, Barbón y Riaño falaron tamién de les "posibilidaes nueves" que s'abren pa la enseñanza del asturianu cola Llei d'Educación (LOMLOE); de la presencia del asturianu nos medios de comunicación públicos (TPA), asina como nel ámbitu institucional, y el papel y posición alministrativa de l'ALLA.
"Nesti análisis global que se fixo de la situación del asturianu, entrambes partes tuvieron d'alcuerdu dafechu y quedaron na necesidá d'afondar nesta política llingüística de dignificación y de recuperación" del asturianu y del gallego-asturianu, señalaron.
