Publicado 19/11/2014 16:54CET

'L'Arume de la tierra', d'Enrique Carballeira, gana'l Premiu Alfonso Iglesias de Cómic en llingua asturiana

UVIÉU, 19 de Payares (EUROPA PRESS)

L'escritor y periodista Enrique Carballeira ganó la sesta edición del Premiu Alfonso Iglesias de Cómic en Llingua Asturiana, que concede la Conseyería d'Educación, Cultura y Deporte y ta dotáu con 3.000 euros.

El xuráu encargáu de valorar les obres presentaes, formáu pol dibuxante Netu, l'escritor y guionista Chechu García y el técnicu en materia llingüístico Luis Casteleiro, reunióse güei baxo la presidencia de la directora xeneral de Política Llingüística, Ana María Fueyo.

A esti galardón podíen presentase cómics d'estilu, tratamientu y tema llibres, escritos en llingua asturiana, y con una estensión mínima de cincuenta páxines, siempre que fueren inéditos y non premiaos n'otros concursos.

Ente les obres presentaes, el xuráu decidió, por unanimidá, conceder el premiu al cómic L'arume de la tierra', del que destaca "l'usu de los recursos propios del llinguaxe del cómic, la calidá gráfica y el manexu de los tiempos narrativos al serviciu d'una historia con transfondo actual". L'autor, Enrique Carballeira, presentóse al concursu col seudónimu Mozer.

Enrique Carballeira (L'Infiestu, 1970) ye periodista, escritor, diseñador y ilustrador. Collaborador avezáu d'Onda Cero y del diariu El Comercio, escribió dellos llibros pa públicu infantil, cómics y cuentos p'adultos.

Nel ámbitu del humor gráfico, ye autor de la tira selmanal 'Les coses de Nardo y Quina', qu'apaez dende va dos décades nos periódicos El Nora y El Fielatu. Amás, nos últimos años punxo en marcha dellos proyectos editoriales, talleres d'escritura, illustración y llingua asturiana, asina como delles iniciatives audiovisuales y d'animación.

Asturianu ofrecido por