Les matrícules n'asturianu y eonaviego crecen un 34,2% nel nuevu cursu escolar

   UVIÉU, 19 Dic. (EUROPA PRESS) -

   La Conseyería d'Educación incrementó un 34,2% la matriculación n'asturianu y eonaviego nesti cursu escolar, con un total de 30.782 estudiantes. Esa crecedera, que se rexistra per cuartu añu consecutivu, vien motiváu fundamentalmente pola introducción de la llingua autóctona nel segundu ciclu d'Infantil como elección voluntaria.

   Según detalló'l Principáu, l'acercamientu a la llingua asturiana, al traviés de dalgunos de los conteníos incluyíos nel área de deprendimientu Comunicación y representación de la realidá, enllantóse de forma simultánea nos trés niveles del segundu ciclu d'Infantil. Esti primer añu matriculáronse 7.652 neños y neñes: 6.220 en centros públicos y 1.432, n'alcordaos. La cifra supera'l 48% del total del alumnáu d'esta etapa educativa, un datu bien satisfactoriu pa esti cursu inaugural.

   Si se descontara l'alumnáu d'Infantil, el balance resulta tamién positivu. Los estudiantes de Llingua Asturiana y Lliteratura en Primaria, Secundaria y Bachilleratu esperimenten una llixera medría del 0,83% respectu al cursu anterior.

   Según la directora Xeneral d'Inclusión Educativa y Ordenación, Dolores Bueno, esta crecedera reflexa ensin dulda el creciente interés y la reconocencia del valor de la nuestra llingua, non yá como patrimoniu cultural, sinón tamién como un elementu fundamental pal desenvolvimientu integral del nuestru alumnáu.

   La principal crecedera de matrícula n'asturianu y eonaviego producióse ente l'alumnáu de Secundaria de la rede alcordada, con un 36,5% más que'l cursu 2024-2025, siguíu de Bachilleratu en centros públicos (8,7%) y Primaria na enseñanza alcordada (4,2%). Sicasí, en Primaria y Secundaria de la rede pública producióse un llixeru descensu del 1% y el 0,2%, respectivamente.

INICIATIVES PA FOMENTAR L'ASTURIANU

   Otra iniciativa pionera nel Principáu foi l'entamu esti cursu de la ufierta d'asturianu nes Escueles Oficiales d'Idiomes. El primer pasu diose n'Uviéu, onde se contabilicen 43 persones matriculaes nos trés niveles disponibles: 33 nel A1, estremaos en dos grupos; 3 nel B1 y 7 nel C1. La matrícula caltiénse abierta.

   Pa Bueno, la posibilidá d'ufiertar la enseñanza del asturianu nes Escueles Oficiales d'Idiomes supón una meyora significativa na so reconocencia académica y social, ampliando les oportunidaes de deprendimientu pa tola población adulta.

   Per otru llau, la conseyería dispón yá de nuevos materiales didácticos pa toles etapes educatives, que fueron ellaboraos por dellos grupos de trabayu coordinaos pola Dirección Xeneral d'Inclusión Educativa y Ordenación. Pal segundu ciclu d'Infantil preparáronse espresamente 220 propuestes con xuegos, fiches, audiciones y otres actividaes.