Llamedo afirma qu'Asturies "vuelve ser una tierra d'oportunidaes" con más de 1.300 persones tornaes en 2023

   UVIÉU, 4 Abr. (EUROPA PRESS) -

   La vicepresidenta del Gobiernu d'Asturies, Gimena Llamedo, punxo de manifiestu esti vienres el compromisu del executivu autonómicu cola comunidá asturiana nel esterior y destacó el cambiu de tendencia migratoria que vive la comunidá: "Asturies vuelve ser una tierra d'oportunidaes. En 2023 algamamos cifres históriques de retornu, con más de 1.300 persones tornaes del estranxeru y un saldu migratoriu positivu de casi 12.000 persones".

   Llamedo realizó estes manifestaciones na so intervención nel plenu del Conseyu de Comunidaes Asturianes, celebráu nel palaciu de los Condes de Toreno d'Uviéu, nel que recordó que'l Principáu yá trabaya na organización del próximu Congresu Mundial d'Asturianía, previstu pa payares, que va axuntar a representantes asturianos de too el mundu "pa siguir construyendo futuru de la mano".

   "El mundu mira a Asturies, pero dende Asturies tamién miramos al mundu. Y en esa mirada táis siempre les persones que vivís nel esterior", concluyó.

   Nel actu participaron representantes de centros asturianos y entidaes del esterior xuntu cola presidenta del Conseyu de Comunidaes Asturianes, María Antonia Fernández Felgueroso, y la directora xeneral d'Emigración y Polítiques de Torna, Olaya Gómez Romano.

   "Los Centros Asturianos sois les nueses embaxaes nel mundu. Caltenéis vivu'l vínculu con Asturies y sois parte esencial de lo que somos como comunidá", señaló la vicepresidenta, quien tamién sorrayó la importancia de fortalecer esa rede de vínculos "con recursos, con diálogu y con futuru".

   Llamedo detalló dalgunes de les principales llínees d'acción del executivu autonómicu en materia d'emigración y torna en 2025, como l'aumentu de les ayudes a la torna hasta los 700.000 euros, con más de 500 persones yá acompañaes poles oficines del programa de manera física o virtual. El refuerzu del financiamientu p'actividaes ya infraestructures de los centros asturianos, qu'anguaño cuenta con un presupuestu de 440.000 euros, 20.000 más qu'en 2024.

   Tamién se refirió a la promoción d'Asturies nel esterior al traviés d'actos turísticos y culturales entamaos en collaboración colos centros y al incrmentu de los programas dirigíos a la mocedá, como Oríxenes, que tamién aumentó'l so presupuestu en 20.000 euros, hasta algamar los 70.000, o la Escuela d'Asturianía, que la so nueva edición va cuntar con 26 participantes el próximu xunetu.

   Llamedo mencionó los hasta 460.000 euros de l'ayuda a persones asturianes mayores en situación vulnerable y la continuidá del programa 'Añoranza', del que yá se beneficiaron 65 emigrantes.