La Llegra acueye la presentación del 'Anuariu de la Música Asturiana' de 2017

UVIÉU, 2 Ene. (EUROPA PRESS) -

L'Anuariu de la Música Asturiana, revista con 18 años de vida y una incidencia bultable nel panorama musical asturianu, llega un añu más fiel a la so cita per estes feches y failo con un repasu fondu a lo que dio de sí'l recién pasáu 2017. La presentación d'esti volume nuevu va facese'l próximu vienres 5 de xineru, a les 19.30 hores, nel Llar La Llegra (c/Postigu Baxu, 40) d'Uviéu. Nella van tar presentes los sos responsables --Xune Elipe, Damián Barreiro y Xicu Ariza-- y van repartise los primeros exemplares.

Como de costume les temátiques céntrense n'estilos como la música tradicional, el folk, el rock o la canción d'autor, con secciones qu'inclúin reportaxes, informes, entrevistes, crítiques, opinión, cróniques, recoyida de material o anuncies.

L'Editorial, nesta ocasión titúlase 'Un tiempu meyor' y nél fálase de la preocupante situación actual de la música asturiana, que resumen con estes palabres: ''La creatividá musical asturiana ta nun momentu mui baxu: nun surden proyectos nuevos, la volatilidá de los pocos que se creen ye evidente, nun hai renovación xeneracional, les producciones discográfiques salen a cuentagotes...'', por eso apelen a que les alministraciones y medios de calter públicu tomen cartes nel asuntu.

En cuantes a los conteníos, destaquen los reportaxes titulaos 'Lletres y música: un femenín poco plural', sobre la presencia de muyeres nel panorama musical asturianu; 'Una década ente los meyores', onde se fai un repasu a los diez años del Premiu al Meyor Cantar; o 'Música na dómina dixital', alredor de les maneres nueves de rellacionase col fechu musical les xeneraciones más moces.

Tamién hai esti númberu entrevistes a Xosé Ambás, na que repasa los diez años del programa 'Camín de cantares'; y a Felpeyu, que presenten el so trabayu discográficu nuevu; o les cróniques sobre'l Premiu al Meyor Cantar 2017 y del I Congresu Gaites nel Mundu; amás d'un especial sobre'l XXX Aniversariu de Dixebra.

L'Anuariu zárrase, como ye vezu, cola sección Collecha, onde apaecen les producciones del añu 2017, ventiséis en total, nes que destaquen los temes sueltos más que los discos completos.

El volume compleméntase con un discu onde se recueyen muestres de lo meyor qu'ufiertó'l 2017, con diecinueve cortes repartíos n'estilos como la tonada, el folk, el rock, les bandes de gaites o la canción d'autor, con artistes y grupos como Antón Menchaca, Mur, La Bonturné, Marisa Valle Roso, Felpeyu, Dixebra, Los Berrones o Misiva. Ente los collaboradores d'esti númberu nuevu hai firmes como les de Damián Barreiro, Xicu Ariza, Xune Elipe, Ismael Arias, Alberto Álvarez Peña, Inaciu Llope o Adolfo Camilo Díaz.