L'usu de la boca como una tercer mano pudo causar la última caries descubierta nun fósil neandertal

MADRID 2 Sep. (EUROPA PRESS) -

Un equipu lideráu pol Muséu Nacional de Ciencies Naturales (MNCN-CSIC) documentó'l séptimu casu conocíu d'una caries dental nun neandertal. L'estudiu, publicáu en American Journal of Biologial Anthropology, confirma que se trata d'una mancadura incipiente detectada nun molar d'home adultu que vivió n'Asturies.

En concreto pertenez a ún de los trece individuos que vivieron na cueva d'El Sidrón (Asturies) fai unos 49.000 años de los que se mantienen más del 2500 restos óseos que dexaron reconstruyir aspectos de la so vida cotidiana, la so salú y les sos práctiques culturales, como nesti casu, el curiáu y usu intensivu de la dentición. La investigación apunta a que la caries se produxo pola combinación d'una dieta rica en carbohidratos y l'usu de contino de la boca como una tercer mano en xeres non masticadores.

Los investigadores comprobaron qu'esti individuu, identificáu como 'adultu 6' d'El Sidrón, presentaba una notable gastadura dental causada por una dieta dura y abrasiva a lo que se suma'l desarrollu d'actividaes non masticatories, como'l ralláu de pieles d'animales colos dientes, que contribuyíen al deterioru de la dentina y favorecíen la colonización por bacteries responsables del deterioru progresivu de les pieces dentales.

Les caries nos neandertales, como esta observada n'El Sidrón, orixinábense por bacteries del microbioma oral, como Streptococcus mutans, que producen ácidos capaces de desmineralizar l'esmalte y la dentina. Nesti estudiu, l'equipu tamién identificó la presencia de S. mutans por aciu l'análisis del ADN antiguu conserváu nel sarriu (técnicamente denomináu cálculu dental) del individuu estudiáu.

Estos depósitos endurecíos nun solo apurren información sobre la dieta -qu'incluyía alimentos cocíos y ricos n'almidón-, sinón que tamién actúen como reservorios de bacteries productores de caries, lo que refuerza'l so papel nel desarrollu d'estes patoloxíes orales.

Pa evaluar la pieza dental fósil l'equipu esaminó'l diente con análisis químicos non destructivos con un microscopiu electrónicu de barríu ambiental, que xenera imáxenes bien detallaes de la superficie del diente y dexa reparar la estructura de la caries y analizar los cambeos nel esmalte; asina como con tomografía axial computarizada, cola que se llogren imáxenes en 3D del interior del diente ensin estropialo, que s'utilizó pa confirmar la presencia de la caries, midir el so tamañu y analizar la so fondura. L'usu d'estes técniques dexó a los investigadores verificar la descalcificación nos cantos de la mancadura y l'estensión de la mesma.

Estos análisis dexaron estudiar la caries apurriendo información sobre'l so orixe, desarrollu y relación cola dieta y el comportamientu del neandertal.

"Tou apunta a que l'usu intensu de la dentición pudo provocar una fisura que, adulces, foi colonizada por bateríes qu'afondaron nel esmalte y la dentina hasta desenvolver la caries: una mancadura en forma de canal de 2,6 mm de llargor", esplica Almudena Estalrrich, investigadora del Muséu Nacional del Ciencies Naturales.

Esti estudiu recuérdanos que les enfermedaes dentales tienen raíces bien antigües na nuestra historia evolutiva y pon de manifiestu que les caries en neandertales, anque menos frecuentes qu'en la nuestra especie, respondíen a múltiples factores.

A diferencia de los humanos modernos, que la so prevalencia de caries aumentó notablemente cola adopción de l'agricultura, los neandertales mostraben una incidencia muncho menor. Nel casu d'El Sidrón, la inclusión frecuente d'alimentos cocíos ricos n'almidón, como piñones y hongos, pudo facilitar la proliferación de bacteries productores de caries como Streptococcus mutans pola lliberación d'azucres que contribúin al desarrollu de caries.

"Hasta agora toles evidencies que documentemos nel rexistru fósil de neandertales correspuenden a ambientes templaos", destaca Estalrrich. "Ye posible que nestes rexones tuvieren accesu a una dieta más rica en carbohidratos, que puen facilitar l'apaición de caries. Consideramos que'l cambéu de la dieta y l'usu de la dentición como una ferramienta de trabayu podríen ser les causes d'esti problema dental, el séptimu que conocemos nel rexistru fósil de la especie", conclúi la investigadora.