UVIÉU, 5 Nov. (EUROPA PRESS) -
Los convocantes de la fuelga xeneral del próximu 11 de payares prevén una gran manifestación n'Uviéu esi día a les 18.00 hores. Confirmolo asin'l secretariu xeneral d'UXT Asturies, Javier Fernández Lanero, a preguntes de los periodistes, magar tovía queden por conocese detalles de la organización y del percorríu.
Fernández Lanero participó al pie del so homólogu en CCOO, José Manuel Zapico, nun alcuentru con asociaciones sociales de cara a la xornada de fuelga. Esplicaron que al ser una movilización tresversal, con reivindicaciones llaborales y otres que van más allá de los centros de trabayu, como acabar col problema de la vivienda, hai distintes organizaciones convocantes amás del movimientu sindical representante de trabayadores. Tán buscando'l mayor númberu de sofitos.
Fernández Lanero dixo que ye importante la implicación de diferentes colectivos porque'l problema social que motiva la fuelga ye daqué qu'afecta a toos.
"Va ser una xornada onde se va a visibilizar el problema de la vivienda, onde en tolos centros de trabayu, del tipu que sían, va salise a reclamar una vivienda digna, y van enllenase les cais de xente na manifestación", comentó.
Pela so parte, Zapico dixo qu'esta vegada ye la primer vegada na historia democrática que se va a realizar una fuelga xeneral "a la ofensiva". Según el dirixente sindical, hasta agora siempre yeren fuelgues reactives a agresiones directes de los gobiernos o de la patronal en retayos de derechos llaborales.
"Encaramos con decisión sacar alantre una fuelga xeneral a la ofensiva pa consiguir pa esti país más derechos y la defensa de los servicios públicos, la xubida de salarios y controlar los precios", señaló.
Nel alcuentru d'esti xueves participó la presidenta del Conseyu de la Mocedá del Principáu d'Asturies, Claudia Lera. "Creemos que la xente xoven ta bien sensibilizada col tema y va secundar la fuelga na so gran mayoría", afirmó.