El Marcelo Gago gana'l I Concursu de Ramos de Navidá d'Avilés

UVIÉU 22 Dic. (EUROPA PRESS) -

La escuela Marcelo Gago ye'l ganador de la primer edición del Concursu de Ramos de Navidá na escuela, qu'entama la Estaya de la Llingua de la Conceyalía de Cultura.

Nesta actividá participó l'alumnáu de site centros educativos públicos de la ciudá: La toba, Llaranes, La Carriona, Enrique Alonso, Marcelo Gago, Villalegre y Palacio Valdés. El premiu ye un cuentacuentos pa l'alumnáu dientro'l mesmu centru escolar Marcelo Gago.

Según l'acta del xuráu, el Marcelo Gago algamó'l primer premiu por considerar que'l so ramu de navidá ye'l "más ellaboráu" y por mostrar "elementos propios del ramu d'esta epoca del añu". Na so composición, amás de llazos y dellos elementos decorativos, tán presentes les mazanes, les nueces, les castañes, les panoyes, les rosquielles y otros elementos, asina como una amuesa de vexetación típicamente asturiana y guiños a l'artesanía de los paxos.

El xuráu d'esti I Concursu de Ramos de Navidá na escuela" tuvo formáu por Verónica Fueyo Alcedo, historiadora y esperta en cultura tradicional asturiana; Rosa Cuervo Jiménez, educadora infantil perteneciente a l'asociación Aladanza Educación y Tradición; Lilián Suárez Casielles, miembru del Conceyu de Cultura Tradicional Vezos Astures; actuando como secretaria ensin voz nin votu, Montserrat Machicado Compañy, responsable de la Estaya de la Llingua.