'Más Asturies, Meyor España', lema de Foru p'algamar representación en Madrid nes elecciones xenerales

Europa Press

UVIÉU, 28 de Xunetu (EUROPA PRESS)

La Comisión Directiva de Foru Asturies aprobó esta tarde'l plan de movilización rexonal que'l partíu va desarrollar de cara a la campaña de les Elecciones Xenerales, y qu'inclúi el lema "Más Asturies, meyor España".

Al traviés d'una nota de prensa, el partíu informó que la Comisión que preside Francisco Álvarez-Cascos conoció y apoyó l'informe presentáu pol Coordinador de la Campaña, Isidro Martínez Oblanca, y acordó poner en marcha'l plan de movilización pa "algamar que Foru Asturies gane les elecciones y promueva'l necesariu cambiu políticu n'España pa llograr qu'Asturies nun siga apostrada y marxinada".

El Coordinador de la Campaña sorrayó la importancia de "llevar a les Cortes Xenerales, la voz y el votu de los asturianos, sin condicionamientos nin limitaciones, con relación a otres Comunidaes Autónomes, de manera que'l próximu gobiernu d'España cuente con Asturies y podamos poner fin a los siete años llargos de marxinación y olvidu del nuesu país".

Pa Foro Asturies, que considera previsible un adelantu electoral, la importancia d'esta campaña va tar en dar respuesta a la entruga "¿cómo te presta España, con Asturies o sin Asturies?". Nel partíu presidíu por Álvarez-Cascos consideren "necesario y crucial pal inmediatu futuru de la rexón que'l próximu gobiernu d'España cuente siempre con Asturies y d'ehí la necesidá de qu'haya una gran representación parlamentaria, que resulte decisiva a la hora de tomar decisiones".

La Comisión Directiva Rexonal aprobó, coles mesmes, la relación d'altes y baxes d'afiliaos al partíu qu'algama la cifra de 10.965 afiliaos.

SALARIU NUEVU

Per otra parte, el presidente de Foru Asturies y del Gobiernu asturianu, Francisco Álvarez Cascos, celebró que "el candidatu socialista, el señor Rubalcaba, enmiende a la totalidá al so gobiernu, del que formó parte mientres los últimos cinco años, y tome como exemplu iniciatives de xeneración d'empléu, como'l "Salariu Nuevu que promueve" el partíu asturianu.

Francisco Álvarez-Cascos recordó que la propuesta llanzada díes atrás pol candidatu del PSOE a la presidencia del Gobiernu, pa la creación d'un contratu de trabayu-aprendizaxe pa mozos desemplegaos, "inspírase nel plan d'empléu xuvenil plantegáu por Foru Asturies nel so programa electoral, y nel discursu d'investidura n'Asturies, y que va implantase con carácter prioritariu".

Álvarez-Cascos recordó que "el plan asturianu tien como midida principal la implantación d'un Salariu Mozu, entendíu como un contratu en práctiques pa fomentar l'empléu temporal de mozos desemplegaos "sin esperiencia llaboral n'obres y servicios xenerales". D'él beneficiaránse paraos menores de 30 años, sin esperiencia llaboral, y inscritos nos servicios públicos d'empléu d'Asturies.

Francisco Álvarez-Cascos llamentó que les contrataciones propuestes por Rubalcaba "queden tan cortes" frente a les propuestes por Foru Asturies, que tendríen una duración d'ente seis y nueve meses y con una cantidá de cobru acordada, pero nunca inferior a la establecida pal contratu en práctiques del conveniu colectivu aplicable. "La propuesta socialista, sicasí, fala de subsidios por un periodu de dos o trés meses, pa mozos sin estudios", esplicó.

La midida de Foru Asturies plantega, amás, programes pa mozos que van incrementase con calter prioritariu mientres la presente llexislatura y qu'inclúin, amás d'esi Salariu Mozu, programes d'Educación-Empresa, "potenciando'l papel de la Formación Profesional y de la Universidá y enllantando un plan de beques".