El Ministeriu cree que la nueva llei de montes asturiana ye inconstitucional y encamienta modificala

UVIÉU, 24 de Mayu (EUROPA PRESS)

La Directora Xeneral de Desarrollu Rural y Política Forestal del Ministeriu d'Agricultura y Pesca, Alimentación y Mediu Ambiente, Esperanza Orellana Moraleda, envió una comunicación al Principáu na que señala la posibilidá de que seya inconstitucional la última reforma llegal aprobada n'Asturies que suprime los acotamientos a la llenda en terrenes amburaos.

"De magar ello, y puesto que previsiblemente va entamar tal procesu de recursu, creo que year bien oportuno que, pela vuesa parte, examinareis la posibilidá de modificar la llei autonómica antes que se produza un procedimientu xurídicu que creo que va prollongar esti asuntu y va provocar dificultaes pa toos, especialmente pal Gobiernu del Principáu", alvierte Orellana nel so escritu, distribuyíu pol colectivu Plataforma poles Acotaciones'.

Argumenta la representante del Ministeriu que, en consultando colos sos servicios xurídicos, l'almisión de la llenda como práctica xeneralizada mientres el primer añu tres la quema prevista na llei asturiana "contravién la normativa ambiental na midida na qu'amenorga los estándares mínimos ambientales esixíos pol llexislador estatal".

Por ello, considera "evidente" que cabe la presentación d'un recursu d'inconstitucionalidá contra la llei. "Nel casu de que se demostrara que la normativa autonómica produz efectos perxudiciales irreparables, debería amás encamentase la suspensión de la llei autonómica", añade.