Muerre María Asquerino

EUROPA PRESS

MADRID, 27 de Febreru (EUROPA PRESS)

L'actriz María Asquerino morrió la nueche del pasáu martes en Madrid a los 85 años d'edá, víctima d'una enfermedá pulmonar, según informó l'asociación Artistes Intérpretes, Sociedá de Xestión (Aisge). Tovía nun se conocen los detalles de la so despidida, dao que la intérprete nun tenía familia.

María Urdiaín Muro, conocida artísticamente como María Asquerino(Madrid, 1927), foi una de les actrices más sobresalientes del teatru y cine español de la posguerra. Morrió cuando la treslladaben los servicios d'emerxencies a la Fundación Jiménez Díaz de la capital.

L'actriz retirárase a últimos del 2008 en representando 'Tío Vania' nel Teatru María Guerrero y pasó los últimos años de la so vida "lleendo la prensa y saliendo con amigos". "Dende neña siempre fui bien caleyera", relató la intérprete na so última entrevista, concedida a la revista Aisge Actúa a mediaos del 2009.

Ente otros papeles, amás de la so trayectoria teatral, a Asquerino van recordala pol personaxe de Pili nel filme 'Surcos' (1951) y pol so calter de "muyer fatal, decidida y independiente", qu'ella atribuyía a provenir d'una familia d'actores y militares. Asquerino nun tenía descendencia y pasó los sos últimos cuatro meses nun centru residencial pa mayores n'El Plantío, nel entornu de Madrid.

Asquerino, fía de los tamién actores Mariano Asquerino y Eloísa Muro, debutó cuando yera una neña nel Teatru de la Comedia y yá en 1941 na gran pantalla cola película 'Porque te vi llorar', de Juan de Orduña.

Trabayó con Luis Buñuel en 'Ese escuro objeto del deseo' (1977) y dirixóla Fernando Fernán Gómez en delles destacaes producciones españoles como 'Mambrú se fue a la guerra' (1986), 'El mar y el tiempo' (1989) y 'Fuera de Juego' (1991).

Dempués, participó en 'Nadei hablará de nosotras cuando nos hayamos muerto', d'Agustín Díaz Yanes (1995), 'La comunidad', d'Álex de la Iglesia (2000) y 'Tiovivo c. 1950', de José Luis Garci (2004). L'últimu filme nel que participó foi 'Pagafantas', el debú cinematográficu de Borja Cobeaga.

En 1989 recibió un Premiu Goya na categoría de Meyor Interpretación Femenina de Repartu pol llargumetraxe 'El mar y el tiempo'. Coles mesmes, recibió la Medaya d'Oru al Méritu nes Belles Artes en 1999 y reconocióla'l Círculu d'Escritores Cinematográficos en 1970 poles películes 'La tonta del bote' y 'Goya', historia d'una soledá.