Muerre Michael Clarke Duncan

UVIÉU, 04 de Setiembre (EUROPA PRESS)

L'actor Michael Clarke Duncan, candidatu a un Oscar pol so papel d'un presu del corredor de la muerte nel drama de 1999 'La milla verde', morrió'l llunes nun hospital, menos d'ocho selmanes dempués de sufrir un ataque al corazón, dixo una vocera.

Duncan -que tenía 54 años- morrió en Los Ángeles, dixo la so prometida, la estrella del programa de telerrealidá Omarosa Manigault, nun comunicáu al traviés de l'axente de Duncan.

L'actor sufrió un ataque de corazón el 13 de xunetu y "nunca se recuperó dafechu", dixo'l so axente, Joy Fehily. Morrió nel centru médicu Cedars-Sinai.

La voz fonda y la envergadura de Duncan, col so 1,96 metros d'altor, diéron-y una presencia autoritaria en pantalla.

Empezó cavando zanxes pa la compañía de gas del so Chicagu natal, y dempués treslladóse a Los Ánxeles pa llabrase ellí una carrera como actor.

Trabayó de guardaespaldes y guardia de seguridá, y interpretó dellos papeles d'esi tipu en películes y televisión, antes de llograr una pequeña interpretación en 'Armageddon', en 1998.

Eso llevólu a un papel más importante nel drama carcelariu 'La milla verde' (1999), con Tom Hanks. Duncan interpretó a un presu con poderes máxicos, al qu'executen por crimes que nun cometió.

"Michael foi'l más xentil de los corazones, un exemplu de decencia, integridá y bondá", dixo Frank Darabont, director de 'La milla verde', nun comunicáu. "La murnia que siento ye mala d'espresar".

El papel de Duncan na cinta valió-y una candidatura al Oscar. "La presencia de Duncan ye lliteral y figurativamente lo más grande de la película", escribió'l críticu del Washington Post Desson Howe.

Tamién tuvo papeles en 'El rey escorpión' (2002), el filme inspiráu nel cómic 'Daredevil' (2003) y en 'Sin City' (2005). Tamién emprestó la so voz a la película d'animación 'Kung Fu Panda'. Eti añu apaeció en dellos episodios de la serie dramática de la Fox 'The Finder'.