Muerre'l periodista d'Europa Press y escritor asturianu Damián Barreiro con 40 años

UVIÉU 6 Feb. (EUROPA PRESS) -

El periodista d'Europa Press y escritor asturianu Damián Barreiro Maceiras, morrió esti miércoles a los 40 años d'edá na so casa d'Avilés.

Allegre, comprometíu y gran compañeru, Damián Barreiro Maceiras entamó n'Europa Press en setiembre de 2017, y dende entós encargábase del serviciu de noticies n'asturianu, amás de cubrir información rexonal y local.

Los sos compañeros y compañeres d'Europa Press n'Asturies llamentamos fondamente la muerte del nuestru amigu quería Damián, de quien siempre vamos recordar la so sonrisa, y unviamos el nuestru pésame más sentíu a los sos padres y hermanu pola terrible pérdida.

Damián Barreiro Maceiras (1984) yera llincenciáu en Periodismu pola Universidaddel País Vasco (UPV), máster en Xestión Cultural pola Universidad Oberta de Catalunya (UOC) y especialista universitariu en "Asturies. Espaciu, Patrimoniu, Historia y Cultura" pola Universidá d'Uviéu.

Foi ganador del Premiu Máximo Fuertes Acevedo nel 2014, 2018 y 2022 con 'Caleya Sésamu: el papel de la televisión na tresmisión interxeneracional de la llingua', 'Asturploitation' y 'Asturianía kitsch: decálogu de la cultura pop astur', amás d'otros premios d'investigación con ensayos sobre llingua asturiana y cultura audiovisual.

Yera militante de la Xunta Pola Defensa de la Llingua Asturiana, trabayó nes redacciones d'Asturies.com y Les Noticies y collaboró con medios como la RTPA, onde foi guionista de programes divulgativos sobre la literatura, música y historia d'Asturies.

Anguaño, trabayaba na redacción d'Europa Press. Amás , yera el responsable de la canal de Youtube 'Horros & Frixuelos', onde analizaba les conexones ente la cultura asturiana y la cultura pop contemporánea.