UVIÉU, 8 May. (EUROPA PRESS) -
El llibru 'Spelunca B. Mariae de Covadonga in Asturiis Hispaniarum Montibus', una alquisición compartida ente'l Cabildru y la Fundación Banco Sabadell, presentóse esti martes, 8 de mayu, en Cuadonga y va pasar d'equí p'alantre a formar parte de los fondos del Muséu de Cuadonga.
El volume, editáu en Bruxeles, en 1635, ye l'exemplar impresu más antiguu que se conoz sobre la historia de Cuadonga. Hasta'l momentu, namás se tenía conocencia de cuatro exemplares en tol mundu, de los que dos tán Bruxeles, otru na Biblioteca Nacional d'España y otru, mercáu pol Gobiernu del Principáu nel añu 2003, ta na Biblioteca d'Asturies Ramón Pérez de Ayala.
La obra empieza con un llargu prólogu nel que s'emponderen los méritos del marqués de Aytona. Nel so interior, describe la Cueva de Cuadonga y narra la batalla qu'asocedió, según el milagru atribuíu a la Virxe pola que los cristianos resultaron victoriosos. La parte final del volume ta dedicáu a comparar les semeyances de la xesta de Cuadonga con otros pueblos cristianos.
L'alquisición d'esti volume, a un particular, supón un arriquecimientu de los fondos del Muséu de Cuadonga, que s'atopa anguaño en fase d'adecuación p'allugar la esposición temporal de la serie cronolóxica de los Reis d'España, que pertenez al Muséu Nacional del Prado, y que previsiblemente va poder visitase esti branu, con motivu del Añu Xubilar.
Amás el Muséu de Cuadonga alluga oxetos d'arte (pintures, grabaos, talles, pieces d'orfebrería y oxetos relixosos) que muestren la hestoria y la tresformación que sufrió'l Santuariu dende'l sieglu VIII hasta los nuestros díes.
