Música, poesía y diversidá cultural nel Fifty-Fifty Festival del 25 al 28 de setiembre n'Avilés

   UVIÉU, 11 Ago. (EUROPA PRESS) -

   El Festival Fifty-Fifty de Jazz y Poesía presenta la so programación ampliada y cargada de música en directu, poesía, reflexón y diversidá cultural pa clausurar la temporada cultural braniza n'Asturies del 25 al 28 de setiembre.

   El festival reafita la so identidá como ún de los eventos más singulares del panorama nacional y européu. Dende la so nacencia nel 2021, el Festival Fifty-Fifty apostó pola paridá artística (50% jazz, 50% poesía), l'ambición internacional, y l'alcuentru ente creadores consagraos y emerxentes.

   Col sofitu del Conceyu d'Avilés, el Principáu d'Asturies y el Ministeriu de Cultura, y distinguíu col Sellu de calidá de l'Asociación Europea de Festivales (EFA), el festival tresforma cada añu la ciudá nun espaciu de celebración cultural, diálogu y emoción.

   Los recitales poéticos, que van tener llugar na Sala Club de la Factoría Cultural, van axuntar a premiaos poetes, traductores y voces emerxentes en trés alcuentros que combinen reflexón, diálogu y llectura en vivu.

   Ún d'ellos de poesía y traducción previstu pal vienres 25 de setiembre con Aurora Luque, Corina Oproae y Francisco Castaño. El segundu a otru día, 26 de setiembre con 'la música de les llingües' con Esther García, Àngels Gregori y Olga Novo. El terceru de los alcuentros lleva por títulu 'Les edaes de la poesía', va celebrase'l domingu 28 de setiembre con Fernando Beltrán, Laura Ramos y Aroa Moreno Durán.

   Amás, el festival va cuntar con seis conciertos de jazz. Les entraes pa los conciertos tán disponibles en uniticket.janto.es y na taquilla de la Casa de Cultura d'Avilés. Amás, les actividaes poétiques son gratuites hasta completar aforu, magar s'encamienta acutar enantes na páxina web www.fiftyfiftyfestival.com.

   La programación del Festival Fifty-Fifty 2025 va completase con más actividaes culturales gratuites como pasacalles, animaciones, talleres, conciertos infantiles, masterclass y una esposición. El Festival Fifty-Fifty convida a disfrutar de cuatro díes de música, poesía y emoción, nun ambiente íntimu y cercanu, con una programación que tesciende xéneros y fronteres.