"Naide va dicinos dende otra comunidá lo que tenemos que recoyer nel nuestru Estatutu", responde Barbón a la RAG

UVIÉU, 11 Ene. (EUROPA PRESS) -

El presidente del Principáu, el socialista Adrián Barbón, afirmó esti martes que naide va dicir "dende cualesquier otra comunidá" lo que tien que recoyer Asturies nel so Estatutu d'Autonomía.

Les declaraciones de Barbón produciéronse poques hores depués de que la Real Academia Galega (RAG) reclamara que l'Estatutu d'Autonomía nuevu d'Asturies declare la oficialidá del gallegu n'igualdá de condiciones que l'asturianu.

Nestos momentos, el nome recoyíu na llexislación asturiana pa la llingua falada ente los ríos Navia y Eo, na zona fronteriza con Galicia, ye 'gallego-asturianu'. Sicasí, la principal asociación cultural del Navia-Eo, Xeira, llegó a denunciar la intención del Gobiernu d'Asturies de camudar el nome al 'gallego-asturianu".

La protesta de Xeira vieno pol usu nos últimos meses pol Principáu del términu 'eonaviegu' pa referise a a la llingua del estremu occidental d'Asturies y depués d'una pregunta de Podemos a la conseyera de Cultura Berta Piñán, que respondió que l'usu d'esti términu básase nun informe de l'Academia de la Llingua (ALLA) y que ye'l que van usar nel diccionariu de gallego-asturianu que ta preparando la institución ('Diccionario eonaviego').

Énte esto, la RAG reclamó esti martes el mesmu tratu pa les dos llingües propies d'Asturies, que señala que son el gallegu y l'asturianu, y critica, amás, que s'escueya'l glotónimu "eonaviegu", que considera que busca "facer invisible la existencia del gallegu" nes zones que llinden con Galicia.

La institución unvió al presidente del Principáu, Adrián Barbón, al Gobiernu d'Asturies y a los grupos parllamentarios l'informe aprobáu nel so últimu plenu ordinariu pola reforma del Estatutu d'Autonomía.

La respuesta de Barbón llegó al traviés d'un apunte en Twitter recoyíu por Europa Press, onde indicó qu'esa reforma va negociase n'Asturies "d'alcuerdu al sentir de los grupos políticos, entidaes y asociaciones asturianes".

"Naide va dicinos, dende cualesquier otra Comunidá y por muncho respetu que-yos tengamos, lo que tenemos que recoyer nel nuestru Estatutu", sentenció'l presidente rexonal.