UVIÉU, 13 Nov. (EUROPA PRESS) -
L'escritor Sidoro Villa Costales (Lieres, 1962), ganador de la XLI Premiu Xosefa Xovellanos de novela con 'El fervinchu', afirmó qu'esti títulu, al igual que les sos anteriores obres, "trata de personaxes reconocibles de la vieya Asturies".
La obra, que pue considerase una novela coral, ta estructurada alredor de la güela, un papel protagonista concebíu como personaxe femenín d'una gran fortaleza y complexidá. El xuráu destacó de la novela "la construcción de personaxes, la so fondura sicolóxica y l'humor negru que percuerre tola obra".
Costales, en declaraciones a Europa Press, esplicó que 'El fervinchu' ye una historia familiar ambientada nos últimos años del sieglu XX y que cuenta "les rellaciones y engarraes d'una castra bien bederre d'asturianos del mediu rural".
"Dalgún muertu tien tamién importancia na trama y xira too sobremanera alredor de la matriarca de la grea, una paisana vieya y neurótica", indicó, p'añadir que se trata "de personaxes reconocibles de la vieya Asturies" onde s'esploren "les sos personalidaes complexes y les sos rellaciones intenses y conflictives".
El ganador del Xosefa Xovellanos últimu ye profesor de primaria en el CP Xentiquina de Lieres, ilustrador y escritor. Tien publicaos llibros de lliteratura infantil y xuvenil como 'Llibru de los suaños' (2007), '¡Nun-yos tengas perceguera!' (2004), 'Mael al debalu' (2010), 'Evaristo Valle, el pintor del antroxu' (2011), 'Nun-yos tengas perceguera 2' (2016). Tamién publicó les novelas 'A estaya' (2016) y 'Tres beyuscos' (2019).
En comparanza con estos dos títulos, Costales esplicó que 'El fervinchu' ye menos complaciente que 'Tres beyuscos', porque los protagonistes muestren menos nobleza, "más rocea". "Ye un rellatu más aforfugante, neso aseméyase daqué a 'A estaya'", afirmó. Con too, señaló que tamién rescampla la bondá o l'arrepentimientu, "bonos sentimientos, en dalgunos parientes de la familia".
Anguaño, al Premiu Xosefa Xovellanos presentáronse doce obres de les que'l xuráu destacó'l "nivel escelente" de munches d'elles. Nesi sentíu, Costales destacó "l'allegría" de recibir esti gallardón, lo qu'afala "esta neciura estraña de siguir escribiendo nesta llingua na qu'a veces parez que nun te llee nin Dios".
L'escritor señala que la novela n'asturianu de güei "tien más calidá, en xeneral, qu'hai quince o venti años". "Hai tres o cuatro autores mui bonos desta, demuéstrenlo nes sos producciones recientes", esplicó, p'añadir que llamenta qu'otros tres o cuatro escritores "perbonos que facíen novela daquella yá nun s'apliquen a ello".
