La nueva Llei d'Infancia axunta'l sofitu de PSOE, IX, Foro y Tomé, pero non el del PP nin Vox

   UVIÉU, 14 Oct. (EUROPA PRESS) -

   La Xunta Xeneral del Principáu d'Asturies aprobó esti miércoles el dictame de la Comisión de Derechos Sociales y Bienestar sobro'l Proyectu de Llei d'Infancia y Adolescencia del Principáu d'Asturies, una norma qu'actualiza'l marcu normativu tres más de trenta años dende l'aprobación de la Llei de Protección del Menor de 1995.

   El diputáu del Grupu Mistu y voceru de Foro Asturies, Adrián Pumares, considera necesaria l'actualización lexislativa, anque reprochó a la Conseyería de Derechos Sociales y Bienestar la so xestión. "La so conseyería tien un suspensu mayúsculu, un suspensu atayante en relación cola protección de los menores", dixo Pumares, quien alvirtió de que la llei contempla midíes que van riquir recursos económicos y alvirtió de que "treslladar responsabilidaes a los conceyos implica tamién falar de cómo financiar o de qué medios son necesarios".

   La diputada del Grupu Mistu, Covadonga Tomé, sofitó'l testu normativu destacando'l derechu a la participación y al escuchu activu de los neños y adolescentes. "Trátase, cenciellamente, de respetar la so dignidá como suxetos de derechu y non como simples oxetos de protección", sorrayó. Tomé tamién punxo'l focu na salú mental temprana y na protección de los menores migrantes non acompañaos al señalar que ye prioritariu amparar a quienes sufren "una doble vulnerabilidá porque son menores pero amás atópense nun procesu migratoriu ensin referentes familiares".

   El voceru de Convocatoria-IX, Xabel Vegas, calificó de pasu históricu" l'aprobación d'esti proyectu de llei qu'asitia a la infancia como protagonista plena de derechos. Vegas dixo que'l testu asitia la prevención como pilastra fundamental y acuta l'acoyimientu residencial pa fomentar la redolada familiar. "Si un menor tien de ser dixebráu de los sos proxenitores, va priorizase siempres l'acoyimientu familiar frente al residencial", defendió'l parllamentariu, recordando amás que la norma prohibe l'alternativa residencial pa los menores de diez años salvu en casos escepcionales.

   Per parte de Vox, la diputada Sara Álvarez señaló que trátase d'un testu "descaradamente intervencionista y sectariu" que supon una intromisión nel ámbitu de les families. Álvarez afirmó que "per debaxo del carambelu de la escucha activa del menor escuéndese'l sometimientu a tolos postulaos de la llei" y criticó que la norma habilite a los servicios del Principáu pa "infiltrasse na vida de los menores y de les sos families" por aciu "actuaciones de choque, en llugar de mecanismos de protección".

   Pol Grupu Parlamentariu Popular, la diputada Beatriz Polledo xustificó l'astención del so grupu pese al trabayu d'enmiendes realizáu, al llamentar que la llei "quedar ensin algamar l'ambición que la infancia asturiana merez".

   Polledo centró les sos crítiques nos relevos al mandu de la Conseyería de Derechos Sociales y Bienestar y nes denuncies sobro la xestión de los centros tutelaos. "Llevamos tres conseyeres; llevamos tres directores xenerales de Dependencia; llevamos tres directores xenerales d'Infancia, agora anúnciase una cuarta; llevamos dos xerentes del YERA; este ye'l reflexu de lo que pasa nuna conseyería que ta absolutamente enchida y en descomposición", recordó. La parllamentaria del PP aseguró que "una llei nun garantiza nada por sí sola si detrás nun hai una bona xestión".

   A lo último, la diptuada socialista Ana Isabel González reprochó la postura del PP señalando qu'una vegada más esmolez-yos más el cálculu electoral que les polítiques sociales" y enfeando que "anteponen el partidismu y abelúguense na astención". Acusó a los diputaos del PP d'incoherencia política, incoherencia parlamentaria y cobardía, muncha cobardía", defendiendo qu'Asturies aprueba güei "una norma moderna qu'asitia a los menores como persones titulares de derechos" que "tienen derechu a ser escuchaos, a participar y a recibir información fayadiza a la so edá".