Obama almite que nun podrá pesllar Guantánamo nel plazu establecíu

EP

WASHINGTON, 18 de Payares (EUROPA PRESS)

El presidente d'Estaos Uníos, Barack Obama, almitió la primer vez esti miércoles que'l zarru de la prisión estaounidense pa sospechosos de terrorismu de Guantánamo, Cuba, nun tendrá llugar dientro del plazu establecíu.

"Tamos nun camín y un procesu nel que yo avanzaría que Guantánamo va pesllase l'añu que vien", dixo Obama, que refugó especificar una fecha pal zarru de la prisión, nuna entrevista pa la televisión estaounidense FOX News dende Pekín, antes de partir hacia Corea'l Sur, dientro de la so xira asiática.

N'otra entevista cola televisión norteamericana, NBC, Obama dixo que munchos de los plazos que supuestamente nun cumplió la so Alministración en realidá estableciérenlos los medios de comunicación, pero respeuto al pieslle de Guantánamo reconoció: "teníamos un plazu específicu que nun cumplimos".

Nes sos declaraciones a Fox News, Obama negó que tea decepcionáu por nun poder pesllar Guantánmo dientro del plazu d'un añu qu'él mesmu estableció poco dempués de llegar a la presidenica en xineru del 2009, argumentando que "sabía que diba ser difícil".

Obama dixo que les dificultaes pa pesllar Guantánamo nun son "solamente técniques". "La xente piensa que comprensiblemente tien mieu dempués de tantos años diciéndo-y que Guantánmo yera crucial pa nun dexar pasar a los terroristes", añadió. Obama alcontróse cola oposición del Congresu estaounidense a los sos planes pa treslladar a Estaos Uníos a los presos de la isla, pa xulgalos, asina como la oposición a recibir a los deteníos de países estranxeros.

Obama aterrizó en Seúl esta tarde, según l'horariu llocal, na última parada de la so xira per Asia, que lu llevó a Xapón, Singapur --onde asistió al Foru de Cooperación Económica Asia-Pacíficu-- y China. Obama visitará la Embaxada estaounidense en Seúl, aconceyará col presidrnte surcoreanu Lee Myung Bak, y visitará a les tropes estaounidenses esti xueves.