La OSPA renueva la so programación artística con proyectos educativos y d'apoyu a los talentos nuevos

UVIÉU 20 Jun. (EUROPA PRESS) -

El conseyu rector de la Orquesta Sinfónica del Principáu d’Asturies (OSPA) aprobó esti mediudía la programación artística pa la temporada 2024-2025, que va empezar esti branu con conciertos estraordinarios en dellos puntos de la xeografía asturiana.

Esti programa musical nuevu iguólu’l director titular y artísticu de la OSPA, Nuno Coelho, y con él búscase averar la música a la sociedá asturiana dende una perspectiva interxeneracional que dexe a la ciudadanía disfrutar d’estes obres.

Les acciones pa llograr esti oxetivu van llevase a cabu al traviés de programes educativos como Link Up o Nxt Gen, un proyectu esti últimu col que se potencien los talentos mozos y col que la OSPA quier dar visibilidá a xeneraciones nueves de músicos.

Nel mesmu sentíu, la Orquesta Sinfónica sigue cuntando esta temporada colos sos collaboradores artísticos, músicos de primer nivel como la mezzo Fleur Barron, el compositor Francisco Coll, Sara Fernández a la viola, Javier Perianes al pianu, Roman Simovic al violín o’l Cuarteto Quiroga. Amás, hai que destacar tamién la presencia na programación aprobada de músicos españoles de sonadía y sobre manera asturianos, ente los que destaquen Rubén Díez, Noelia Rodiles, Aarón Zapico, Daniel Sánchez, Tono Ferriol, Óliver Díaz o Pablo González.

Ente los proyectos afianzaos que se presentaron esti mediudía ta la temporada d’abonu, que nesta ocasión va incluyir 15 conciertos n’Uviéu y 10 en Xixón. Amás, la OSPA tamién va desplazase a Avilés en dos ocasiones.

LA OSPA MUÉVESE PEL TERRITORIU

La OSPA caltién la so presencia n’Asturies al traviés del programa OSPA de cerca. A los conciertos integraos dientro de la temporada d’abonu, que se celebren en Xixón, Uviéu y Avilés, súmense los que la OSPA planificó pelos conceyos asturianos.

D’esta manera, nel mes d’agostu, la orquesta va tar presente en dellos conceyos del oriente y occidente asturianu cola dirección del violinista Gregory Ahss y con Christian Brandhofer al trombón. Ente les obres que van interpretase son de destacar les composiciones de los austriacos Haydn, Albrechtsberger y Schubert: Sinfonía n.u 6 "La mañana", Conciertu pa trombón y Sinfonía n.u 6, respectivamente.

Coincidiendo cola selmana na que se celebra’l Día d’Asturies, la OSPA yá ta trabayando nuna programación especial que va afondar nel averamientu d’esti organismu a llugares alloñaos de les grandes ciudaes cola mira de fomentar una ufierta musical de calidá y accesible a tola ciudadanía. Vivaldi, Garay y Boccherini son dalgunos de los compositores de los que se van interpretar obres nesos díes cola dirección d’Aarón Zapico.

Nel ciclu de conciertos estraordinarios, la OSPA va siguir cola so presencia pel territoriu asturianu. Va facelo participando na Selmana de los Premios Princesa d’Asturies; nel centenariu de San Agustín de la Florida, n’Avilés, y n’Uviéu nes funciones d’El Mesíes, la Selmana de les Lletres Asturianes y el día de San Xuan (esta actuación va tar dedicada a la música de John Williams).

UNA TEMPORADA D’ABONU COMPLETA

La temporada d’abonu va empezar el 10 d’ochobre del 2024 con un conciertu d’apertura que lleva de títulu Mahler eternu y que va dirixir el maestru Nuno Coelho. El director va tar acompañáu por Roman Simovic, concertín de la Orquesta Sinfónica de Londres, y por Pablo Ferrández, ún de los solistes españoles de más proyección, al chelu.

A lo llargo de la temporada, que va llegar hasta xunu del 2025, tán programaos 15 conciertos que lleven de títulu Arquitectura fecha música; Rusia sieglu XX; Manfred, música y lliteratura; El sinfonismu de Dvorak; N’alcordanza d’un ánxel; Una vida d’héroe; Música pa la primavera; Coll dirixe a Coll; Celebrando a Ravel; Un réquiem alemán; Abriendo horizontes; Vuelta a los clásicos; Con aire francés y Sinfonía fantástica.

Los conciertos de la temporada d’abonu van cuntar cola presencia de grandes nomes de la dirección, como Jaime Martín, Pablo González, Shiyeon Sung, Giancarlo Guerrero o Fabien Gabel. Amás, van participar solistes d’un nivel peraltu, como Stephen Hough, Carolin Widmann, Jaquelyn Wagner o Samuel Hasselhorn, que s’incorporen a la llista de collaboradores artísticos virtuosos de la OSPA.

PROYECTOS EDUCATIVOS Y PARTICIPATIVOS

L’eventu OSPAFest va centrase nesta ocasión nos conciertos pa pianu de Beethoven. A mediaos del mes de xunetu del 2025, el director Nuno Coelho y el pianista Javier Perianes van encargase de dirixir los dos programes que formen parte d’esta iniciativa.

D’otra manera, el proyectu Nxt Gen llega de la mano del espíritu participativu y educativu que lleva fomentando la OSPA toos estos años. Nxt Gen, que va celebrase a últimos de setiembre, da visibilidá a les xeneraciones nueves de músicos y ta encabezáu pol profesor Johannes Schlaefli y José Luis Morató a la trompa. Los talentos mozos van dar un conciertu cuando remate’l programa, como resultáu de la masterclass internacional de dirección d’orquesta.

Dientro de les actividaes participatives, en xineru del 2025 va desenvolvese’l conciertu de coros participativos del que van formar parte los coros d’ópera y zarzuela dirixíos pol director titular y artísticu de la Joven Orquesta Leonesa (JOL).

Amás, nel planu educativu y familiar, dientro de los oxetivos de la OSPA p’averar la música a les families y a la xente mozo, van celebrase nos meses de marzu y mayu del añu que vien los programes Variaciones Enigma y LinkUp. Esti últimu ye’l programa educativu diseñáu pol prestixosu Carnegie Hall de Nueva York que la OSPA estrenó n’Europa nel 2013 y que llogró éxitos y cifres de participación bien grandes, pos yá pasaron por él decenes de miles d’alumnos y alumnes dende la primer edición.

La Orquesta Sinfónica del Principáu d’Asturies va salir de xira pa participar nel Festival Bal y Gay (Galicia), nel Festival Internacional de Santander (Cantabria) y nel Festival de Música Española de Llión (Castiella y Llión), ente otros. Y va collaborar tamién cola Ópera d’Uviéu participando n’Arabella, compuesta por Richard Strauss, y n’Aida, de Verdi.