Pelayo Martínez Olay gana'l Premiu Enriqueta González Rubín con Pallabres d'anguaño

   UVIÉU, 21 Oct. (EUROPA PRESS) -

   Pelayo Martínez Olay (Llangréu, 1997) ganó la sesta edición del Premiu Enriqueta González Rubín de narrativa moza n'asturianu con Pallabres d'anguaño. El llibru axunta diecinueve rellatos curtios colos que l'autor s'avera a realidaes variaes de la sociedá actual dende una escritura que'l xuráu define como madura, orixinal y "formalmente impecable".

   Les histories percuerren asuntos mui presentes nel nuestru tiempu, dende l'alzhéimer, l'abusu sexual o'l suicidiu hasta l'adolescencia, la vieyera, el trabayu y les rellaciones sociales.

   Temes complexos que conviven nun llibru que, según el xuráu, resulta "orixinal y sorprendente al mesmu tiempu que realista y mui natural" y ye quien a construyir esi retratu del presente "ensin que resulte un retratu en negro".

   El director xeneral d'Acción Cultural y Normalización Llingüística, Antón García, presidió'l xuráu, del que tamién formaron parte Claudia Gutiérrez Lueje, escritora y ganadora de la edición del 2025; Blanca Fernández Quintana, escritora, y Llucía Menéndez Suárez, docente. María José Ramos Viesca, xefa de la Sección de Normalización Llingüística, actuó como secretaria.

   El Premiu Enriqueta González Rubín de narrativa moza n'asturianu ta dotáu con 3.000 euros. El Gobiernu d'Asturies creó'l gallardón nel 2021 pa reconocer el talentu de les voces nueves de la lliteratura en llingua asturiana y abrir espaciu a autores mozos y a histories nueves escrites n'asturianu.

   Pelayo Martínez Olay ye profesor de Llingua Asturiana y Lliteratura n'Educación Secundaria y graduáu en Llingües Modernes y les sos Lliteratures pola Universidá d'Uviéu. Llogró dellos reconocimientos en certámenes lliterarios y nel 2024 publicó cola editorial CuatroGotes Fuxir, el so primer llibru de rellatos.