Podemos pide la retirada de la medaya a Cosmen pola presunta vinculación con una entidá 'offshore"

UVIÉU, 22 de Setiembre (EUROPA PRESS)

Podemos Asturies anunció que va pidir na Xunta Xeneral la retirada de la Medaya de Plata d'Asturies concedida en 1994 al empresariu asturianu José Cosmen, promotor de la empresa ALSA, fináu nel 2013, tres les informaciones que lu vinculen a él y a la so familia con una compañía 'offshore' aniciada en Les Bahames.

Nuna nota de prensa, Podemos informó que va presentar una propuesta a la Xunta Xeneral nesti sen, en conociendo la información publicada por El Confidencial. Esti diariu asegura qu'en 1984 los hermanos José y Manuel Cosmen Adelaida, dueños d'Alsa, xunto con María Victoria Menéndez Castañéu, esposa del primeru, ocuparon la primer vez los siyones de presidente, vicepresidente y secretaria, respectivamente, de la sociedá Letya Investments Limited, rexistrada en Les Bahames.

Por ello, Podemos va llevar a la Xunta Xeneral la sociedá off-shore de los Cosmen, preguntando "qué midíes va adoptar l'executivu autonómicu y solicitando la retirada de la medaya de plata de Asturies".

"Hai que recordar que'l Gobiernu de Javier Fernández nun tomó nenguna midida cuando apaeció la sociedá off-shore del presidente del Conseyu Social de la Universidá d'Uviéu, Ladislao Azcona, y premió cola medaya d'Oru d'Asturies a los Masaveu dempués de qu'apaecieren na llista Falciani d'evasores fiscales", criticó'l partíu moráu.

Podemos Asturies considera "inaceptable que los que cobren por fletar los autobuses pa los viaxes del Imserso, desfalquen dempués el dineru que tuviera de financiar los centros de día pa los nuesos mayores". Apunta tamién que "cuando en 1994, el PSOE, baxo la presidencia d'Antonio Trevín, concedió la medaya de plata a los Cosmen, estos yá contaben con sociedaes off-shore en paraísos fiscales".