El primer ministru serbiu recuerda en Srebrenica a les víctimes del xenocidiu de 1995

SREBRENICA (BOSNIA), 11 de Payares (Reuters/EP)

El primer ministru de Serbia, Aleksandar Vucic, visitó esti miércoles el cementeriu de Potocari onde reposen los restos de víctimes de la matanza de 1995 na ciudá bosnia de Srebrenica, cuatro meses dempués de que lu recibieren ente insultos y agresiones na mesma zona.

Acompañáu de dirixentes bosnios y ante la presencia de sobrevivientes de la masacre, Vucic depositó flores esti miércoles nel campusantu habilitáu pa los más de 8.000 musulmanes que morrieron a manes de les tropes serbobosnies en xunetu de va 20 años.

"Quiero que Srebrenica torne na ponte de la nuesa cooperación" afirmó Vucic, nel marcu d'una nueva visita qu'evidencia la meyora de les relaciones ente Belgráu y Sarayevu y ente les comunidaes bosnia y serbobosnia.

"Naide va poder devolver los hermanos a les sos hermanes o los fíos a les sos madres, pero podemos llograr un futuru distintu y meyor", aseguró'l primer ministru de Serbia. Nesti sen, confía en que "tolos ciudadanos de Srebrenica, lo mesmo bosniacos como serbios, seyan a tener más trabayu y una meyor vida".

Como una "pequeña contribución" a esti "futuru conxunto", Vucic anunció la entrega de 10 millones de marcos (más de 5 millones d'euros) pal desarrollu de la ciudá. L'alcalde llocal, Camil Durakovic, previó que van poder crease 250 nuevos puestos de trabayu.

Srebrenica, que forma parte de la república Srpska de Bosnia, tien una tasa de desempléu que ronda'l 50 por cientu. Los bosniacos representen nesti momentu a una tercer parte de la población, mientres qu'antes de la guerra (1992-1995) suponía'l 75 por cientu.