Publicado 24/10/2017 15:21CET

El Principáu impulsa una nueva edición de la Xunta d'Escritores, depués de trece años ensin celebrase

Cartes de les Xuntes.
GOBIERNU D'ASTURIES.

UVIÉU, 24 Oct. (EUROPA PRESS) -

Más de 50 autores y diez meses de debate van protagonizar la VII Xunta d'Escritores Asturianos, qu'entama'l Gobiernu d'Asturies esti 28 y 29 d'ochobre en Villaviciosa col títulu de 'Lliteratura asturiana presente'. Va ser 30 años depués de la primer Xunta, celebrada en Villamayor, y 13 dende la última, que foi en Llanes.

Al traviés d'una nota de prensa, el director xeneral de Política Llingüística y Normalización, Fernando Padilla, destacó la necesidá d'esti alcuentru, tres de 13 años ensin convocase depués del postreru d'estes característiques, celebráu en Llanes nel 2004. L'alcuentru coincide tamién col trenta aniversariu de la primer Xunta, que foi en Villamayor.

Por too eso, la Conseyería d'Educación y Cultura y el Conceyu de Villaviciosa decidieron entamar un alcuentru nuevu que, col títulu de Lliteratura Asturiana Presente, quier poner al día la situación de les lletres asturianes, al empar que reivindicar la so presencia na sociedá.

Van ser diez les meses de debate que se van celebrar dende la mañana del sábadu hasta'l mediudía del domingu nos dos escenarios escoyíos pa la ocasión: el Teatru Riera y la Casa de los Hevia.

Y van ser 54 los autores que van participar nestes meses pa tratar asuntos como'l presente de la lliteratura asturiana, el relevu xeneracional polos escritores más mozos, la traducción d'otres llingües al asturianu, el papel de los medios de comunicación, la importancia de la lliteratura infantil y xuvenil, la salú de la crítica, la difusión y normalización de la producción cultural, la situación actual de la novela y la visión que de la nuestra lliteratura se tien fuera d'Asturies.

Amás d'un actu d'homenaxe a Xosé Caveda y Nava, que se va facer a les puertes de la so casa natal, va presentase'l documental 'Escribiendo'l camín, 30 años de xuntes d'escritores asturianos' y una revista conmemorativa que va axuntar una muestra de los autores más mozos.

Como material de reflexón, va dase a los participantes un llibru coles aportaciones crítiques de dellos especialistes que dan la so opinión de los aspectos más relevantes de la lliteratura escrita n'asturianu. Asina mesmo va agasayase a los asistentes con un númberu nuevu de 'Trabatel. Revista eonaviega de lliteratura'.

Más d'un centenar d'escritores confirmaron la so asistencia a la VII Xunta, a la que tamién van dir persones que formen parte de la cadena del llibru y qu'intervienen na promoción de la lliteratura asturiana, como periodistes, críticos, técnicos de los servicios de normalización municipal, representantes d'instituciones, editores, llibreros...

Va contase, asina mesmo, cola presencia de trés autores que representen la creación n'otres llingües peninsulares: la poeta cordobesa Elena Medel, l'escritor portugués Jose Rui Teixeira y la escritora valenciana Anna Moner, que van participar al llau de Xuan Bello y Berta Piñán na mesa de debate 'En perspectiva. La lliteratura asturiana vista dende fuera', que va moderala Martín López-Vega, director actual de Cultura del Institutu Cervantes.

Asturianu ofrecido por

Lo más leído

  1. 1

    Fallece el padre de Irene Rosales

  2. 2

    Felipe González denuncia que el Gobierno pacte con los que quieren "desguazar" España y avisa: "Nadie me manda callar"

  3. 3

    El diario francés 'Le Figaro' califica a Ayuso como "la nueva musa de la derecha española y bestia negra" del Gobierno

  4. 4

    Tamara Falcó nos deja sin respiración con su espectacular look rojo a lo "Pretty woman"

  5. 5

    Andalucía triplica casos Covid en 24 horas, suma 54 muertes y registra el menor dato de hospitalizados de noviembre