Publicado 02/05/2019 13:11CET

El Principáu publica un discu colos 40 meyores cantares de la historia de la música asturiana

El Principáu publica un discu colos 40 meyores cantares de la historia de la música asturiana
EUROPA PRESS.

UVIÉU, 2 May. (EUROPA PRESS) -

La Conseyería d'Educación y Cultura publicó'l doble discu conmemorativu '40 años al son de la nuestra música/40 anos al son da nosa música', pa celebrar la Selmana de les Lletres Asturianes, que nesta edición ta dedicada a la música fecha n'asturianu y gallego-asturianu.

El discu, onde se recueyen cuarenta temes que repasen les últimes cuatro décades, presentólu esti xueves nel Muséu de Belles el director xeneral de Planificación Llingüística del Gobiernu asturianu, Fernando Padilla, acompañáu de la filóloga del Serviciu de Normalización de la Conseyería, Lourdes Álvarez, y la escritora Marta Mori y la técnica de normalización María Xosé Rodríguez, que xunto al escritor Inaciu Llope y el periodista Damián Barreiro formaron la comisión qu'escoyó los cuarenta cantares.

Ente los grupos que formen parte del discu, que se va repartir de baldre esti vienres, Día del Llibru Asturianu, en 60 llibreríes al mercar llibros n'asturianu, tán Nuberu, Mariluz Cristóbal Caunedo, Dixebra, Seliquín, Felpeyu, Silvia Quesada, Skama la Rede, Anabel Santiago, Llan de Cubel, Bacotexo o Carlos Rubiera. Asina hasta un total de 40 grupos colos sos 40 cantares.

Nesi sentíu, Padilla destacó que la música ayudó a visibilizar y normalizar la llingua asturiana gracies a "cantares en toa triba de xéneros", polo qu'esta Selmana de les Lletres supón "un reconocimientu públicu a tolos músicos".

Per otru llau, el director xeneral indicó qu'amás de nes llibreríes, el discu --que va tener 3.500 unidaes-- va repartise de baldre peles biblioteques y escueles públiques y quixo agradecer a les discográfiques y interpretes que collaboraron desinteresadamente col discu "ensin cobrar nada".

Como miembru del xuráu, Marta Mori esplicó que la escoyeta "xeneró más d'una discusión" ente'l xuráu porque "hai más candidatos que posibilidaes" pa incluyir nel doble discu, al haber temes que tuvieron que quedar fuera.

Con too, esplicó, como "la música asturiana camina al empar que la lliteratura del Surdimientu", el xuráu decidió facer un "percurríu históricu" onde se tuvieron en cuenta tolos xéneros, el papel de les muyeres na música asturiana o la producción en gallego-asturianu. "Un trabayu guapu, pero mui difícil", dixo Mori sobre'l llabor de selección de los 40 temes.

Asturianu ofrecido por